Nagaland sorkari asayar 305 nem senpet agütsüogo

Kohima kübok IG Stadium nung agiba asayartem nem senpet sen aser tetushi agütsüba sentong nung Nagaland Chief Minister, T.R. Zeliang (Abelen, 2 buba)-i T. Imtisungit Ao nem Best Coach kulikaket agütsüdang agiba noksa ka yangi angur. (Kohima, August 09)

Kohima, August 09 (TYO): Nagaland sorkar kübok Youth Resources & Sports Department (YRSD)-i asayar nisung 305 tashi nem senpet sen agüja tanü, Mongolbar nü tushiogo.
Taoba mapang, 2013 küm nungi tenzüka taküm, 2016 küm March ita tashi nung Nagaland state asoshi takokba aser konang bener arutsüba nüngtem nung saisapongtsü shilem 15 nungi asayar 305 aser coach 1 nem tanü senpetji agüja liasü.
Tanü Kohima kübok Indira Gandhi Stadium (IGS) nung sentong tajung ka agia, Nagaland Chief Minister, T.R. Zeliang; Nagaland Parliamentary Secretary, YRSD, Khriehu Liezietsu aser Chief Secretary, Pankaj Kumar nungeri Nagaland Sports Policy mapatong den sentaktepa, regional, national aser international sabang nung gold, silver aser bronze medal agizüker asayartem nem ajak agi senpet sen lakh 58 tashi agütsü.
“Asayartem ya state aser linük ambassador kaka lir aser parnok ajanga alimai asen state aser asen nüburtem indang jenjang meteta akümer,” ta Zeliang-i metetdaktsü.
Asayartemi pei takokba anguba dak temulung lema meli, tarutsü anogotem nung maneni takok tuluba ajangzüktsü merangtsü ajungshiba den külemi, Nagaland nungi asayartemi regional sabang nung dang masü saka national aser international sabang nunga takok angutsü imala olen ka Chief Minister-i sangoktsü.
“Tarutsü anogotem nung saisapongtsü ki o jen tajungba renemtsütsü asoshi Nagaland sorkari bendanga inyaktsü nangzüker,” ta Zeliang-i nangzüka liasü.
Coach 1, gold medal agizüker 102, silver agizüker 90 aser bronze agizüker 113 densema, tanü senpetji shilem 4 küma lemsar agütsü aser Badminton Coach, T. Imtisungit Ao-i Best Coach senpet agizük.
Gold shilem nung Karate nungi asayar 3, Athletics nungi 9, Taekwando nungi 5, Football nungi 50, Weightlifting nungi 1, Wushu nungi 8, Muaythai nungi 6 aser Sepaktakraw nungi 20 tashi densema liasü.
Silver shilem nung Karate nungi asayar 21, Badminton nungi 8, Football nungi 2, Wrestling nungi 2, Judo nungi 6, Weightlifting nungi 1, Wushu nungi 8, Boxing nungi 6, Muaythai nungi 4 aser Sepaktakraw nungi 35 densem.
Ano, Bronze shilem nung Karate nungi asayar 1, Athletics nungi 8, Taekwando nungi 9, Badminton nungi 2, Wrestling nungi 1, Judo nungi 12, Wushu nungi 10, Boxing nungi 9, Muaythai nungi 3, Sepaktakraw nungi 26, Tennis nungi 3, Softball nungi 21 aser Archery nungi 5 densemba osang jangjaogo.
“Tangar dak alia kanga junga asayar nem senpet sen agüja parnok tushitsü mapatong 2006-07 tenzük aser idangji asayar 137 nem senpet agüja liasü. Ano, 2013-14 nungi tenzüka, 2016 küm March ita tsüngda nung asayar 617 tashi shim,” ta tan senpet sen agüja asayartem nem tetushi agütsüba indang jembia, YRSD nung director, Asangla Imti-ia ashi.
Asayar aser coach-temi temaba jenajng angutsü atema parnok ajungmesotsü nükjidong nung senpet sen agütsütsü mapatong tenzükba olen ka laisa metetdaktsü.
YRSD nung Commissioner & Secretary, L. Kire mendensüa tanü sentongji agi aser Secretary General, Nagaland Olympic Association, T. Meren Paul-i tepela o jembia sentong tembang.