Nagaland sorkari AYUSH system ajungketer: Pangnyu Phom

Dimapur, February 6 (TYO): Deobarnü Health & Family Welfare Minister S. Pangnyu Phom-i 4 buba AYUSH Minister’s Conference nung aden.
Pangnyu Phom-i sentong nung o jembidang Minister of State (Independent In-Charge) for AYUSH Shripad Naik aser Ministry of AYUSH-i pa iba sentong nung adentsü jaokba atema pelaba metetdaktsü.
“Nagaland ya December 1, 1963 nü India nung state 16 buba asütsü kümtet. Küm 50 dak tema (traditional healers) dak alaka health sector nung Allopathic teyari dang liasü. AYUSH Society-i linük nung aser talisa Nagaland nung shilem tajung agia arudar,” ta Minister Pangnyu-isa ashi.
Centre sorkari Nagaland nung AYUSH ajungkettsü atema bendanga agüja aser nendaka mapa inyakdar. Kasa mapang nung Nagaland sorkaria AYUSH system ajungkettsü atema inyaker aser tang Doctor 6 lir aser regular medical officer post 8 atema cabinet nungi temelaba meshia lir, ta paisa ashi.
National Health Mission (NHM) aser National AYUSH Mission (NAM) kübok AYUSH doctor 82 tashi contractual inyakyim nung anioka lir aser parnok District Hospitals, Community Health Centres aser Primary Health Centres nung mapa lemzükja lir. Department of Health & Family Welfare kübok AYUSH Society-i Nagaland nung AROGYA MELA asemben tashi ayonga agiogo, ta Pangyu-isa shisem.
Onoki Public Health Outreach, AYUSH Gram, School Health Programme, ASHA’S & ANM’S Training Programme, mozü aketba süngdonglidong atemba maparentem inyaka arur. Ozü department-i Department of Youth Resources, NYK, Defence den yaritepa International Day of Yoga (IDY) mungyonga arur, ta Pangyu-i metetdaktsü.
National AYUSH Mission (NAM) tenzükba sülen mapang tatsüka tsüngda mapa aser sentong aika inyaka arudar. Dimapur nung yipten 10 aliba AYUSH Hospital ka lapokogo aser Tuensang district kübok Noklak nung yipten 30 aliba AYUSH Hospital ka yaküm December ita lapokogo, ta paisa ashi.
Kohima district kübok Razha nung yipten 50 aliba AYUSH hospital ka ita ka ana tsüngdang renemtsü. Ano Mokokchung district kübok Sapangya nunga yipten 50 aliba AYUSH hospital ka yangludar aser Longleng o Zunheboto nunga AYUSH Hospital lapoktsü atema state sorkari Details Project Report (DPR) agütsüogo, ta paisa shisem.
Nagaland state-i Utilization Certificate (UC) magütsüba kecha mali aser onoki Ministry-i latetba ama tarutsü nunga mapa inyak aotsü nangzüker. Nagaland nung AYUSH Directorate balaka lapoka maliba ajanga timtem ajurur anungji Ministry of AYUSH-i Nagaland nung AYUSH Directorate ka lapoktsü atema yaridaktsünür, ta Minister Pangyu-i mepisha metetdaktsü.