Nagaland sorkari CSS Hindi tesayurtem ‘extension’ atema inyaktsü

Kohima, March 10 (TYO) : Union Ministry of Human Resources Development (MHRD)-i Nagaland sorkar dang Centrally Sponsored Scheme (CSS) ajanga shimba Hindi tesayurtem ajak state kübok anioktsü atema shiogo. Nagaland nung CSS Hindi Teachers 1379 lir.
Union MHRD-i state sorkar dang CSS Hindi Teacher temji state sorkar kübok mapa inyakertem ama züngoktsü asüngdangogo, saka state sorkari tangbo yamaji meinyaktettsü, ta School Education & SCERT Minister, Yitachu-i tanü osangbener dang ashi.
State Budget session metenzükdang pa Delhi-i oa, Nagaland nung iba scheme maneni inyaka aotsü atema jembitsü, ta Yitachu-isa shisem.
“CSS Hindi Teachers indang kümsükji March 31 nung tembangtsü saka state nung senotsü timtem aliba nung ajemdaker onoki CSS Hindi Teachers pur extension atema asüngdangtsü. Parnok state sorkar mapa inyakertem ta züngokba nungbo khuret mali, saka parnok nem itasen agütsütsübaji khuret tulutiba asütsü” ta paisa metetdaktsü.
Ajisüaka, CSS Hindi Teacher tem Nagaland state sorkar mapa inyakertem kübok anioktsü atema mapa inyaktsü, ta Yitachu-isa ashi.
Nagaland nung CSS Hindi Teachers nem ita 9 indang itasen magütsüba atema March 8 nungi All Nagaland Hindi Teachers’ Union (ANHTU)-i shilem lemsar lungkak aitba sentong agir. Iba atema Yitachu-i ashiba agi, “senotsü peria melemzüktsüba ajanga Union MHRD-i Union Finance Ministry dang nungi senotsü talila angutsü atema mapa inyaker.”
Ita 9 tashi itasen manguba ajanga CSS Hindi Teacher tem kanga timtemer aser iba atema department aser sorkari itasen agütsütsü atema kanga meranga mapa inyakdar. Anungji, ANHTU-i lungkak aitba sentong maneni agiyongya, department indang tia angatettsüla. Ajisüaka, nenoki ozüng alema mapa meinyaktsüla kechiyong iba jagi tesayur akhümket mapa ta asüba naroküm menentsütsü, ta School Education & SCERT Minister-isa ayongzük.
ANHTU-i School Education Department dang March 7, 2017 tashi nung CSS Hindi Teachers nem ita 9 indang itasen agüjang ta takhangba agüja anogo züngzüktsü.
Tang ANHTU-i shilem lemsar lungkak aitba sentong agir aser parnoki district ajak nung District Education Officer aser Sub-Divisional Education Officer office tem kima nung badge tanak kahloker lungkak aiter.
March 15 nungi ANHTU-i Directorate of School Education nung itasen magütsü tashi lungkak aittsü telemtetba agia lir.