Nagaland sorkari Kerala nem sen crore 1 tenla agutsü

Nagaland sorkar tenüng nung Deputy Chief Minister, Y. Patton-i Kerala Chief Minister, Pinarayi Vijayan nem sen crore 1 indang cheque agutsüba noksa nung angur. 

Kohima, Luroi/August 23 (TYO): Nagaland State sorkar nungi Deputy Chief Minister, Y. Patton leniba nung teshimtet telok ka Luroi/August 22, 2018 nü Kerala tonga oa Nagaland state sorkar tenüng nung Kerala Chief Minister, Pinarayi Vijayan ajurua temeim lemsatepa liasü; Patton-i Kerala “Chief Minister’s Distress Relief Fund” atema sen crore 1 tenla agutsü, ta ketdangsertem osang ka ajanga metetdaktsü.
Tzümetsüng agi Kerala kongshiba sülen Deputy Chief Minister-i Thiruvananthapuram (Kerala) semdangba mapang nung osangbenertem den jembidang pai, state nung alima tzü-mopung agi kanga mejungi kongshiogo, ibayongji Kerala nunger senso ajak den Nagaland nung alirtemi tejashi lemsateptsü atema parnok tonga aru, ta metetdaktsü.
Nagaland sorkar aser Nagaland nung alirtem ajak tenüng nung pai iba lendong nung asürtem kibongtem den mangyim jashi lemsatepa liasü.
Paisa Kerala nungeri iba lendong anema longjemer inyakba atema tenüngsang agütsüba den külemi state nung kümzükba maparen aser teyari agutsüba maparen inyaker nija aser tentet ajak dang pelaba lemsatep.
Paisa India Ato kilonser aser Centre sorkari Kerala nung tzümetsüngji ‘alima tzü-mopung lendong tulu’ ta sangdongba atema pelaba lemsatep.
Paisa Centre sorkar dang Kerala yanglushiba aser asentenshiba maparen nung akokba tashi yaritsü mepishi.
“Iba ama timtem aser tejashi mapang nung Naga nungeri Kerala nunger senso shia timtem jashiji angateter, kechiyong Nagaland nunga tan mongpu nung tzünglu sashia arudar. Alima tzü-mopung ajanga Nagaland nunga anentsüh aika aluogo, koba ajanga kiojen den gari lenmang aser apu aika raksaogo,” ta pai lemsatep.
Akhidang nungi Nagaland aser Kerala na adianu tesendaktep lir, ta shia pai, Malayallee (Kerala) nunger adianutemi Nagaland terenlok, talisa human resources aser shisaliok terenlok nung shilem tulu agiba ajanga Naga nunger sentsüh lir, ta ashi.
Linük den külemi Nagaland-ia iba ama jashi mapang nung Kerala den nokdaker aser parnok den tajungtiba agi amaliteptsü, ta paisa ashi.
“Kerala nunger iba lendong tulu ajanga teraksatsüba nungi tekaraba nung asentenshitsü atema sarasademtsür, aser tekaratiba nung ‘Tsüngremer linük’ ta ajaba Kerala asentenshir yangertsü aser azükarutsü atema ajak takoksang Tsüngremi moatsütsü ta imlar,” ta paisa lemsatep.