Nagaland sorkari Naga yimten ken o atema maneni inyaktsü : Angh

Kohima, July 21 (TYO) : Naga yimten ken o tetsükdaktsü melii latettsü asoshi state sorkari maneni inyaktsü, ta Nagaland Angh, P B Acharya-i tanü metetdaktsü.
“Ozü sorkar atema mezüngbuba teinyaktsüji Nagaland nung yimjung aser terenlok bener arutsü atema lir, aser state sorkari India sorkar dang Naga yimjung maparen tekaraba nung inyaktsü aser ibaji ajanga Naga yimten ken o atema telemtetba ka agitettsü atema inyakang ta maneni mepishiyonga arudar,” ta Angh-i ashi.
“Asenoki yimten telok ajak agi akümba sorkar ka tang lir aser iba nung züngsem 60 prongla dena lir. Tang Nagaland sorkar nung Opposition Bench mali. Yimjung aser terenlok bener arutsü tangatetba nung ajemdaker yimten telok ajak külemi sorkar akümbaji Nagaland state nung dang masü saka linük nunga tan mezüngbuba kümtetogo,” ta PB Acharya-isa shisem.
NLA Speaker-i Nagaland Legislators’ Forum (NLF) den Naga yimten ken o atema Parliamentary Working Committee tentetba atema Angh-i tenüngsang agütsü.
Nagaland nungi MP aser MLA tem ajak longjemer inyakba ajanga Naga yimjung maparen jenjang tajungba nung inyaka aotsü imlar, ta paisa shisem.
Angh-i tensa indang onük jembidang ashiba agi, NSCN(K)-i India sorkar den 2001 nungi ceasefire tenangzüktep agia aliba March 2015 nung agienba dak alaka Nagaland nung tensaji tajungba lir.
“NSCN(K)-i ceasefire tenangzüktep agienba sülen parnoki sepaitem amaker aser item tatalokba nung sepai aika taküm samaogo,” ta PB Acharya-isa ashi.
NSCN(K) aser India sorkar nati nübortem kümzüka ayutsü aser parnok tensa tajung nung lidaktsütsü atema tekaratiba nung ceasefire yanglushitsü mepishir, ta paisa tayongzükba agütsü.
Naga telungpur teloktem aser jila nung mulungtet teloktemi saru aika saruba atema Angh-i tebilemtsü khuret bena ashiba agi, October 2014 nungi retired Supreme Court Judge ka lenisüba kübok High Powered Committee kati iba khuret atema bushisüngdang südar.
Nagaland Angh-isa küm ka tsüngda state sorkari inyakba mapatem indang osang metetdaktsüdang, Mokokchung, Chazouba, Peren, Wokha aser Zunheboto nung women resource centre lapokba ashi.
Ano, primary school tem nung tesayur peria maliba khuret asoshi sorkari Mon, Tuensang aser Kiphire nung primary tesayur 200 shimba aser Maths o Science tesayur inyaktsü atema local candidate maliba atema tangalen nungi nübo anir arutsü atema mapa inyakdar ta paisa metetdaktsü.
State sorkarisa Peren, Longleng aser Kiphire nung District Institute of Education and Training (DIET) lapoktsü aser district 8 nungi Block Institute of Teacher Education (BITE) lapoktsü sentong lir, ta Angh-isa ashi.
PB Acharya-isa Soil & Water Conservation, Veterinary & Animal Husbandry, Roads & Bridges, Public Health Engineering, Rural Development amala nung mapa jenti inyakba osangtem metetdaktsü.
Tan assembly session nung Nagaland state aser idaki aliba nübortem indang khuret benoka olemteptsü aser itemji koktetsü atema telemtetbatem takok ngua agitsü imlar, ta Angh-isa yimsüsürtem ayongzük.