Nagaland sorkari pensioner nem arrear sen agütsütsü mepir: DDPA

Dimapur, March 15 (TYO): Nagaland sorkari 2006 küm jakdang pension agir pensioner-tem nem par tatakzük pension arrear agütsütsü temepishiba olen ka Dimapur District Pensioners’ Association (DDPA) Tir, I. Meren Longchar-i tanü sangdong ka ajanga metetdaktsüogo.
“India sorkar kübok Personal, Public Grievances & Pensions ministry-i tan March 5 nü tuyuba ama inyaka, Nagaland sorkari pensioner-tem nem parnok angutsü aliba pension arrear sen agüja pensioner taküm jenjang tajungba kümdaktsütsü ajungshir,” ta pai sangdong ajanga metetdaktsü.
“Tanü putu nung osettsüset jenjang kanga saka akümba ajanga pensioner-temi pei pension sen agi dangbo pei kibong memesütetsüsa kümogo,” ta shia, Nagaland sorkari 2006 jakdang pensioner agir nem pension arrear sen tekaratiba nung agütsütsüla ta DDPA tirisa ashi.
Iba temepishibaba ama Nagaland sorkari meinyakra, DDPA-i Central aser State sorkar na kübok tentetba pensioner-temi ajurushiba timtem reprangshitsü tentet balala nungi teyari agitsü renemba olen ka pai metetdaktsü.
Ano, O.P. Gupta aser Union of India (U.O.I) ken o nung Supreme Court-i 1987 küm obendang agütsüba ama, arrear senji küm nung 18% interest metenloksemer agütsüsa akümtsü akok ta paisa shisem.