Nagaland sorkari power supply shitak agütsütsüla: K Therie

Dimapur, July 11 (TYO): Power Department-i Dimapur nung transmission aser distribution system tajungba kümdaktsütsü sentong atonga liasü aser iba atema ni inyakba kümsük nung India sorkari Rs. 78 crores lemzüktsü, ta NPCC Tir K. Therie-i ashi.
“Tanü load shedding indang osang kecha mali saka power supply shitak magütsüba ya Transmission & Distribution system ajanga asütsü akok. Transformer agi makokba ajanga power supply shitak mangur aser külen field worker tem light abenba yinzü tejen amshidang timtem kanga ajurur. Ano, mapang shia field worker tem light agi apuba osang angashidang kanga temulung raksar, anungji power supply tsütsü meyipa reprangshitsüla aser nüngdakba mapatem inyaktsüla,” ta K. Therie-i Honibarnü sangdong ka nung ashi.
Industry teimba ka power supply agi mapa inyaker aser power supply shitak manguba ajanga takoksa angur. Ano, mozü kitem nunga machine tem power supply ajanga amshir, ta paisa ashi.
Power Department ya kanga dang tongtipang department ka lir anungji Nagaland sorkari power supply shitak agütsütsü atema temulung agütsütsü nüngdaker, ta K Therie-isa metetdaktsüogo.