Nagaland sorkari public tesem ajak shibanger

Dimapur, March 20 (TYO): Nagaland nung COVID-19 noktangtsü aser prokshiba azüoktsü atema sorkari public tesem ajak shibangtsü telemtetba agiogo.
Public tesemtem rongnung State Museum, Archives, Library, World War-II Museum Kisama, Academy Hall, Bamboo Hall, RCEMPA Jotsoma, Children’s Park aser Capital Convention Centre dena lir.
“Park, recreation centre amala public tesem ajak shibangtsü aser tanga tetuyuba ka magütsü tashi melapoktsü” ta Home Department Principal Secretary, Abhijit Sinha-i sangdong ka nung metetdaktsü.
Superintendent of Police (Crime) & PRO, Manojkumar, IPS-ia tanga sangdong ka nung ketdangser aser staff dak alaka nisung shinga Police Headquarters (PHQ) Office-i marudaktsütsü ta metetdaktsüogo.
Ano tanga sangdong ka nung, Kohima Deputy Commissioner, Gregory Thejawelie, NCS-i Kohima District kübok aliba ATM booths aser bank counters ajak mapang shia mozü agi merüktsü tetuyuba agütsüogo.
ATM booths nung customers atema hand sanitizers yutsütsüla, ta paisa ashi.
Maneni, Confederation of Nagaland Chamber of Commerce and Industry (CNCCI)-ia tanü New Field Check Gate, Dillai Gate aser Train station semdanga Covid19 indang screen asüba maparen reprangshima liasü.
CNCCI Chairman Dr. Khekugha Muru aser General Secretary Dr. Seyeville Mor nati aniba teloki Survillance team den ajurutepa sensaksem aser Nagaland shishilembartem tenüng nung pelaba metetdaktsü.
Tanü CNCCI teshimtet teloki tepela sayua tzü, juice aser pocket friendly hand sanitizers lema agütsü.
CNCCI-isa Covid19 anema raraba ya meimchir indang rara ka lir aser nisung ajaki iba rara nung takok angutsü atema yariteptsü mepishia metetdaktsü.