Nagaland sorkari teyariteper ka ama dang shilem agitsü : TR Zeliang

Kohima, March 18 (TYO) : India sorkar aser NSCN(IM) tsüngda Naga tebilemtsü asoshi olemtep nung Nagaland sorkari indangindanga shilem magir, saka telemtetba ka magi tashi tiyongtsü nung teyariteper ka ama maneni shilem agitsü, ta Nagaland Chief Minister T R Zeliang-i metetdaktsü.

Sorkar nung opposition mali aser iba ya kanga dang tongtipang mapang ka lir. Iba ya züngsemtemi tebilemba ka aser tenangzüktep ka asoshi külemi longjemtsü mulungtetba aser Naga yimten tebilemtsü atema inyaktsü telemtetba ajanga lir, ta tanü TR Zeliang-i State Assembly nung ashi.

Naga yimjung olemtep nung teyariteper ka ama sorkari tan March 9 nü tanga Naga yimten teloktem den ajurutepogo, ta paisa shisem.

“Telok kar samatsütsü mesüra tetsükdaktsü ajurudaktsütsü tebilemba kecha mali. Ajisüaka, onok taginübaji ajak den asüngdangyatepba inyakyim nung yimten telok ajak dendaktsünür” ta TR Zeliang-isa metetdaktsü.

Nagaland nung nübortemi temulung aser tebilemba ka asütsü aser tatok agütsütepba tangatetba nung mangatettep ajak agientsü mepishir, ta paisa ashi.

“Küm aika asenoki Naga yimten tebilemtsü telemtetba ka agitsü atema inyaka arur, anungji tanü iba inyakyim asen kishizüng tonga arua aliba maongka ya magii metoktsüli” ta yaküm August 3 nü Centre aser NSCN(IM) tsüngda Framework Agreement agiba atema TR Zeliang-i ashi.

Naga nungertemi NSCN(IM) aser Centre tsüngda tang tejembidak olemtep tejangja memetetibo o mashi mejembitsüla, kechiyong iba nung lendong keta lir. Kuli tejangja mali ser tebilemba lemsatepba ajanga tajung bener marutsü aser teyari kecha magütsür. Asenok shingaia kechi ataloktsüar meshitettsü, paisa shisem.

Nisung ajaki agizüktetba aser ano Naga yimten telok ajak densemba telemtetba ka agitsü teimla lir.

Telemtetba koma ka agidir agiaka, iba nung ajak adentsüla. Teinyaktsütem lateta mayudang Naga yimten telok ajak dang asüngdangyatsüla ta onoki Interlocutor dang nenshia ashir. Sorkari yimten telok ajak adentsü atema jembiba dang masü saka SS Khaplang den ajuruteptsü atema Naga nunger kin tanishirtem yok. Naga yimten telok ajak longjemer tatembang telemtetba ka agitsüla ta sorkar aser nübortemi aginüba osang sangoktsütsü atema SS Khaplang den ajurutep, ta chief minister-isa ashi.

TR Zeliang-isa assembly nung züngsemtem dang kuli melii jembiba onüktem sülen manidaktsü ayongzük. Paisa “alternative arrangement ka yanglura, ibaji Parliament nung benoka olemtep atema Constitutional amendment inyakyim nung asütsü” ta ashi.