Nagaland sorkari war tourism ajungkettsütsü atema inyaktsü

Kohima, April 18 (TYO): World War II mapang Kohima nung tongbang rarar küm 75 ajungba nüngtem nung küm piyong war tourism ajungkettsütsü atema Nagaland sorkari inyaktsü, ta ketdangsertem osang ka ajanga metetdaktsü.
Kohima WW-II (1944-2019) sülen küm 75 ajungba nüngtem nung tanü hotel Vivor, Kohima nung Gallantry award agütsüba sentong ka Kohima Educational Trust aser Kohima Educational Society nati ayongzüka agi.
Naga World War-II veteran 43 nungi jazükertem nem Gallantry Award medals aser certificates agütsüba sentong nung jembidang state Chief Secretary, Temjen Toy-i, sorkari war tourism ajungkettsütsü, ta metetdaktsü.
Temjen Toy-i, Kohima nung World War II tongbang raraba ajanga Naga nunger putiotsü dang masü saka alima putiotsü-a melenshi, ta ashi.
Pai ashiba agi, World War II mapang nung Naga nunger aikati jenjang balala nung tenzüka liasü aser British sorkaria tetushi agütsü, ajisüaka parnok dak nungi jakzükertem aikati iba indangji meteta malitsüa akok.
Parnok tsüraburtem aser tetsü-tebou nungertemi inyakba mapa tajung bilemtetdaktsütsü atema award agütsüba sentong ya ayongzüka agir, ta shia Toy-i, iba ama sentong ayongzüka agiba ajanga pei kibong puti otsütem asentenshitsü, aser ibaji teti atema asütsü imlar, ta metetdaktsü.
Kaketzülur aser Kohima Education Society züngsem, Charles Chasie-i Naga gallantry award angurtem aser iba dak sendakba kakettem aser medals bushiba maparen ya Kohima tongbang sülen küm 70 ajungba mapang nungi tenzüka liasü, ta metetdaktsü.
Paisa, Royal Commonwealth Ex Services League (RCEL) aser Kohima Educational Trust (UK nung)-i medal samar alir Naga war veteran indang medals temesüktep yanglu, ta metetdaktsü.
Chasie-isa, World War II mapang Naga nunger sepaitemi anguba Gallantry Awards 69 jangjaogo aser maneni ano bushitettsü imlar, ta ashi.
Kohima Education Society Chairman, Dr P Ngully-i, “taküm asenoki küm piyong iba tongbang bilemteta amonger, asenok asoshi pei tajungtiba agütsürtem dang pelaa parnok bilemtettsüji kanga tapet,” ta ashi.
“Tanü parnok aika asenok den mali, ajisüaka parnok ajanga asenok ajungmesodaktsür aser loktiliba nunga temelenshi adokdaktsür. Parnok mapang nung pei tajungtiba agi tenzükba atema parnok nem tetushi agütsütsü kanga tetemsü,” ta paisa ashi.
State Chief Secretary den Curator Kohima Museum, York, Bob Cook nati Naga war veterans chinur aser semchirtem nem gallantry award medals aser certificates lema agütsü.
Gallantry Award telemsa balalaji yamai liasü- Order of British Empire & Member of the British Empire, British Empire Medal, Military Cross, Military Medal, Imperial Service Medal, Military Cross, Indian Distinguished Services Medal aser Indian Police Medal liasü.