Nagaland sorkari yimjung maparen nung maneni yariteptsü : Angh

March 15, 20 16 nü Nagaland Angh, P.B Acharya-i Nagaland Legislative Assembly nung o jembidang agiba noksa ka angur.

Dimapur, March 15 (TYO) : Centre aser Naga telungpur teloktem tsüngda tang teinyakdak yimjung maparen nung state sorkari maneni tongti shilem agitsü ta Nagaland Angh, P B Acharya-i metetdaktsü.
“Yimjung asoshi inyakba mapa nung state sorkari maneni tongti shilem agitsü” ta state Assembly nung anogo pungunü budget session tenzükdang Angh-i ashi.
Tarutsü putu asoshi loktiliba nung shilem ajaki mulungsoa yimjung maparen nung yariteptsü mepishir, ta PB Acharya-isa ayongzük.
“August 3, 2015 nü India sorkar aser NSCN(IM) tsüngda Framework Agreement tenangzükba agitep aser iba sülen telok balala den asüngdangyaba maparen tenzükogo” ta paisa metetdaktsü.
Angh-isa March 2015 nung NSCN(K)-i ceasefire agienba ajanga Naga nunger tsüngda shisabulu bener arutsü aser iba atema sasa bilemer. State sorkar aser civil society-i Centre aser NSCN(K) dang ceasefire tanaben ayutsü atema mepishir, ta Angh-isa metetdaktsü.
“Nagaland Legislators Forum nungi Parliamentary Working Committee (PWC)-i mepishiba ama Naga Hoho aser Eastern Naga People’s Organisation (ENPO) nati February ita Myanmar nung oa NSCN(K) teshimtet nübotem dang ceasefire alitsü tayongzükba agütsüba atema sorkari NH aser ENPO dang kanga pelar” ta PB Acharya-isa shisem.
Paisa, PWC-i yaküm July ita aser taküm February ita nung Centre nung yimten telok balala nungi lennirtem den ajurutepba atema tenüngsang agütsü.
Nagaland nung tensa kanga junga liasü saka taküm February 6 nü Tuensang district kübok Shamator nung tai maketba apuani tepsetba ajanga Kiphire, Pungro aser Shamator tesemtem nung tensa mejungi aküm, ta paisa ashi.
“Tesem ajak nung nübo timba aliba teloktemi nübo agi tangar memenepba teloktem kümzüka ayutsü bilemtsüla. Mang ayangtsü tangatetba malitsüla aser ozüngi melaba ama mapa inyaktsüla” ta Angh-isa ayongzük.
Directorate of Sainik Welfare and Resettlement-i Nagaland nung registered ex-servicemen 2,560, World War-II veteran 63 aser amitsür 1,800 tashi yaridar, ta paisa ashi.
State asoshi tsünüsenbongba ya kanga dang tongtipang aser iba asoshi state sorkari aluyimba tsütsü nüngdakba technology tem amshia jenjang ajungkettsü atema sentong lir. 2015-16 tsüngda foodgrains production hectare ka nung seret 2,270 tongtettsü atema alizüng lir. Taruba küm pungu tsüngda Coffee Board of India den yaritepa Integrated Watershed Management Programme kübok Nagaland nung hectare 5,000 nung coffee tsünütsü sentong lir, ta PB Acharya-isa metetdaktsü.
Fisheries Department-ia National Fisheries Development Board kübok district ajak nung ango rendaktsütsü atema inyakyim tasen ka tenzükogo aser Environment, Forest & Climate Change Department-i community based wildlife protection takok ngua tenzükogo.
2015-16 nung tang tashi MGNREGS kübok 127.05 lakh man-days mapa agütsüogo. Backward kintem temeten kümzüka ayutsü atema state sorkar tan session nung Nagaland Backward tribes Commission Bill, 2016 benoktsü aser Department of Public Health Engineering-i tesem 92 nung tzü mesüoktsü aser tzü tamajung anguba tesem 32 nung water treatment units yanglutsü, ta paisa ashi.
Angh-i Power tsütsü jembidang ashiba agi, Department-i Mon district kübok Chen tesem nung MW Tehok Mini Hydro Electric Project mapa tenzükogo aser Sovima, Dimapur nung 66/11 KV, 20 MVA Sub-Station ka aser Kohima nung 25 MVA, 132/33 KV Sub-Station ka yanglutsü atema taküm mapa tenzüktsü ta ashi.
Nagaland State Mineral Development Corporation-ia Kiphire district kübok Mimi nung Mega Cement Plant ka yanglutsü
Angh-i Education tsütsü jembidang, sorkar school tem jenjang tajungba kümdaktsütsü atema mapa inyaker aser school o tesayurtem medemdangba maparen tang teinyakdak lir. School Education department nung personnel management yanglushiba aser Directorate nung budget reprangshimba ajanga itasen nung sen aika endokba ajema kümogo, ta metetdaktsü.
State Council for Educational Research & Training (SCERT)-i Alternative English atema Naga Heritage indang textbook ka adokogo. 2016-17 nung SCERT atema tongtipangba mapaji Peren, Longleng aser Kiphire nung DIET tasen lapoktsü aser Sechu, Longkhim o Chuchuyimlang nung BITEs asem lapoktsü atema asütsü, ta
Health sector indang jembidang, Nagaland nung TB tendangtsü aser anepalutsü atema laboratory tem lapoktsü ta Angh-isa metetdaktsü.