Nagaland sorkaria Citizenship Amendment Bill anema ola adoktsüla

Dimapur, Yimpoksüi (November) 30 (TYO): Afghanistan, Bangladesh aser Pakistan linüktem nungi aruba Hindu, Sikh, Buddhist, Jain, Parsi aser Christian tem India nung küm 6 lir külen senso agütsütsü indang Citizenship Amendment Bill Joint Parliamentary Committee (JPC)-i reprangdanga arudar. Parliament nung iba bill agizükra linük asem nungi aruba nisungtemi kulikaket kecha meliaka India kübok tesem mashii ka nung alitsü akok anungji iba bill magizüker, ta Nagaland Tribes Council (NTC)-i metetdaktsü.
Linük nung chichiba sensotem akoksar bendanger nem senso agütsüba maparenji magizüker. Parliament nung bill agizükba ajanga timtem tulu ajurutsü aser Nagaland ama state tila ka nung takoksa jenti ajurutsü. Iba lendongji ajiteta Meghalaya aser Mizoram State assembly temibo bill magizüktsü atema assembly resolutions renemogo. Maneni iba bill ya Assam Accord of 1985 den meputepba ajanga Assam sorkari bill anema noktaker. Iba jagi JPC-i iba bill kübok Assam state medendaktsütsü atema bilemer, ta NTC Media Cell-i metetdaktsü.
Reprangdangra, Nagaland state sorkari tanü tashi iba bill atema ola madoker aser Nagaland-i bill anema menokdakba agi JPC-i Nagaland semdangi marur. Nagaland-i ola madokba ajanga asenokibo bill ji agizüker ta tangari bilemer, ajisüaka iba bill ajanga asen state asoshi lendong tulu bentsür arutsü. Anungji PDA sorkari iba tongtipang onük atema temulung agütsütsüla aser Joint Parliamentary panel-i parnok tebilemba mashidang, Nagaland-ia iba bill magizüker ta state sorkari sangdongtsü ayongzüker, ta NTC-isa ashi.