Nagaland SRCW-i ken ajanga Nagatsürtem ajungmesor

Kohima, March 9 (TYO): State Resource Centre for Women (SRCW) Nagaland Chapter-i Nagatsürtem ajungmesoba ken ka sayaogo.
Hokolbar nikongtsütsü International Women’s Day benjung amungdang SRCW-i Nagaland Social Welfare Department den yaritepa “Rise, Naga Women” ken saya.
Iba ken ya Theyiesinuo Keditsu-i mejem aser Topeni K Assumi-i aten. Ken nung kongki olaji Khyochano TCK-i atem.
Iba sentong nung Chief Secretary, Temjen Toy, IAS aden aser pai Data Bank sayatsü. Paisa Women Helpline- 181 indang animated film ka sayatsüba den Mahila Shakti Kendra aser district ajak atema Sakhi – One Stop Centre lapoktsü.
Iba sentong nung Temjen Toy-i o jembidang alima nütsüng yongsük nung tetsürtem tesadang ka lir anungji kasa temeten angutsüla ta ashi.
Tetsürtem asoshi inyaktsüba ya Social Welfare Department indang dang masü saka Health, Education aser Agriculture tem dena tanga department tem indang tebilemtsü lir. Tetsür dak sendakba onüktem aser scheme, parnok ajungkettsü aser tashi itdaktsütsü atema mapa inyaktsüla, ta paisa ayongzük.
Naga loktiliba nunga kilung nung tetsür dak tashiyim mapa inyaker aser iba atema aoksar. Nagaland nung wadang aika nung tetsürtemi tebur dang nungi tajungba inyakteter anungji Nagatsürtemi tenokdangba ajak ajangteter tebur den kasa noktaktsü imlar, ta Temjen Toy-isa metetdaktsü.
Sentong nung okila jembidang Social Welfare Department Secretary, Sarah R. Ritse-i o jembidang “Beti Bachao Beti Padhao, Mahila Shakti Kendra, Sakhi- One Stop Centre and Women Helpline – 181 mapatem ya SRCW ajanga inyaker” ashi.
Mahila Shakti Kendra scheme kübok Longleng district atema District Level Centre ka lapokogo saka ibaji district 8 Kohima, Mokokchung, Mon, Peren, Phek, Wokha, Tuensang aser Kiphire nunga amenoktsü, ta laisa ashi.
Human Resources maparen inyakdar aser Deputy Commissioner indang office tem nung mapa lemzüktsütsü, ta Sarah-isa shisem.
One Stop Centre ya integrated scheme ka lir aser iba centre ajanga tetsürtem 24x 7 teyari agütsür. Tang Dimapur aser Kohima nung One Stop Centers (OSC) lapoka lir aser Women Helpline-181 den sendaktepa lir, ta laisa metetdaktsü.
Sentong nung mendenji Secretary NSSWB & Mission Director SRCW Daisy Mezhür liasü, Additional Director Social Welfare Tulula Pongen-i o jembi aser Research Officer SRCW Meneno V-i anküp tepela o jembi.