Nagaland state ajanga Naga nunger melemsatsüla: NSCN-IM

Dimapur, Sept.01 (TYO):  Tang India o Naga nunger na tsüngda meraketa agizüktettsüsa telemtetba kati arutsüsa ana nung alidang, Nagaland nung aliba Naga nungertem indang kija jembitsübaji shisa makaba mapa ka asütsü, kechiyong Naga nungerji ka dang, Nagaland state kübok alir aser Nagaland tezü nung alir ta mali. Anungji, Nagaland state ajanga Naga nunger melemsatsüla, ta NSCN-IM lenirtemi sangdongba osang ka nung metetdaktsüogo.
Naga nunger asoshi kodangkata Nagaland state ya telemtetba tajungtiba ka masütsü, Nagaland akümtsü latetba ken o ajak NNC teloki aitsüogo, anungji Nagaland akümba ken o ya tamalenyongi agienogo, ibayongji alima nung ozüngmetetter mongin aser yimjung bushitsürtem aikati tenla tajung agüja shilem agiba ajanga tang ‘Framework Agreement’ yanglutetogo, ta NSCN-IM telok tenüng nung  Gen.Rtd. Kholi, Vice Chairman,  A.K.Lungalang, Collective Leadership member, Tongmeth Wangnao, Collective Leadership member aser Q.Tuccu, Collective Leadership member, parnoki metetdaktsü.
Nagaland state akümba ajanga anguba tajangzüktem magitetba purtem India aser Myanmar kübok tesem aika nung sükshia lir, ajisüaka Nagaland state agi tenük sünga alirtemi ‘Framework Agreement’ nung Naga nunger yimten nüchiso aser alushi yimten ka kübok longjemtsü indang shia mali ta menütsür ta parnokisa mepelaba ken o ka metetdaktsü.
Ajisüaka, Nagaland state government, lokti tentet aser Arogo aser taintem aikati ‘framework agreement’ mapa küma telatetba kati arutsü asoshi yaritepba atema pelar, ta NSCN-IM lenirtemisa metetdaktsü.
India government-i Naga yimten ka kübok Naga nunger ajak longjema alitsübaji tim ta agizüktetba agi Naga nunger pelatsü tim aser iba tangatetba nung India o Naga nunger na tsüngda telemtet tajungtiba ka agitsü mapang tonga arudagi, ta NSCN-IM lenirtemisa metetdaktsü.
Naga nunger tsüngda Naga nunger tilaba mesüra tuluba kecha mali ajak Naga nunger aser shibai Naga nunger temeten atema raradir, pabaji Naga nunger asoshi taküm bendanga agütsüba nokinketer asütsü ta parnokisa metetdaktsüogo.