Nagaland State BJP-i National Unity day amung

Dimapur, November 1 (TYO) : Central BJP head Office nungi tetuyuba agütsüba ama Nagaland State BJP-i October 31, 2015 nü Sadar Patel tasoba anogomung nüngtem nung National Unity Day mungogo, ta sangdong ka nung metetdaktsü.
Iba anogomung tenüng nung party head office, Dimapur nung shisatokden sentong ka ayongzüka agi, ta General Secretary & Spokesman, BJP Nagaland K.James Vizo-i sangdong ka nung metetdaktsü.
Shisatokden sentong nung mendenji State President Dr M.Chuba Ao liasü aser BJP MLA, Imtilemba Sangtam Advisor for Co-operation & Macrofed, HK.Khulu,IAS (retd.) aser State o district tentettem nungi party züngsemtem aden, ta sangdong nung shia lir.
National Unity indang onük jembidang BJP MLA Imtilemba-i telok longjemtsü aser tejakleni aotsü atema yaritepa inyaktsü tayongzükba agütsü.
Telok sasep nung obang meputep adokba ken o tem asoshi print aser electronic media nunger dangi moi telok sasep nung dang angatetteptsüla. Ibaji asen linük nung Prime Minister Modi indang taginüba aser inyakyim lir, ta paisa ashi.
Sentong nung taoba general secretary(Org.) BJP Nagaland aser State executive züngsem Doodh Singh-i Sardar Vallabhbhai Patel indang taküm otsü metetdaktsü.
Iba sentong tembangba sülen BJP lennirtem senden ka alidang taoba National BJP President Nitin Gadkari lenisüba kübok Ministry of Road Transport & Highways nem tezüluba ka agütsütsü telemtetba agi, ta General Secretary & Spokesman-isa sangdong nung shia lir.
Iba Draft committee convener ji HK.Khulu asütsü aser züngsemtemji Vihoshe James o Doodh Singh na shim. December 3, 2015 nü Nitin Gadkari Nagaland semdangi arudang iba tezüluba agütsütsü sentong lir, ta sangdong nungsa metetdaktsü.