Nagaland State BJP Unit-i Naga Hoho aser NBCC den senden agi

Dimapur, October 21 (TYO) : Mongulbarnü President Dr M. Chuba Ao aser National Secretary cum State In-charge Farooq Khan na lenisüba kübok Nagaland State BJP Unit-i Kohima nung Naga Hoho aser NBCC den sensaksem mapang liasü.
Naga Hoho den ajurutepa sensaksemdang, tir Chuba Ozukum-i, Prime Minister Narendra Modi-i Naga Peace accord mapa inyakba atema tenüngsang agütsü.
Ano Center interlocutor RN Ravi-i yimjung maparen takok ngua ketdangsüa inyakba atema Naga Hoho tirisa pa dang pelaba metetdaktsü.
Linük nung tanga tesemtem den külemi Nagaland State-a renloka aotsü atema BJP-i Peace Accord takok ngua inyakba mapa nung yariteptsü, ta BJP züngsemtemi senden nung metetdaktsü.
India sorkari Arrla 371(A) agientsü akok ta Naga nunger public-i bilemer ta Chuba Naga Hoho tiri olen ka ashidang, BJP züngsemtemi iba tebilembaji khenyongi mali ta langzü.
Naga nungertemi osang tiyazü belenshiba nung tamang makatsüla ta parnokisa shisem.
BJP züngsemtemisa Nagaland Baptist Church Council (NBCC) den ajurutep aser iba mapang General Secretary Rev. Dr. Zelhou Keyho-i Farooq Khan pelashishia agizük.
NBCC-i “Clean Election in the State” omen nung ajemdaker Nagaland nung aliba arogotem nung election dak sendakba mapa nung temelenshi bener arutsü atema inyaker, ta NBCC General Secretary-i ashi.
Linük kübok tesem kar nung züngsem agi tangar memenepba teloktem aser talisa Khristan tem lendongbang nung lir ta NBCC General Secretary-i olen ka ashidang, BJP National Secretary aser Minority In-charge Farooq-i, BJP-i telok tila ajak lendong nungi kümzüka ayutsü ta langzü.
BJP teshimtet telokisa Nagaland BJP MLA tem den senden ka agi aser iba senden nung Transport & IT Minister P. Paiwang Konyak, Treasury & Accounts Adviser Dr TM Lotha aser Co-operation & Macrofed Adviser Imtilemba Sangtam nungertem aden.