Nagaland State BJP Unit-i TR Zeliang den ajurutep

Bodbarnü Nagaland State BJP Unit President, Visasolie Lhoungu-i anir ketdangpurtemi Chief Minister, TR Zeliang den ajurutepdang agiba noksa angur.

Dimapur, April 20 (TYO) : April 20, 2016 nü Nagaland State BJP Unit President, Visasolie Lhoungu-i anir ketdangpurtemi Nagaland Chief Minister, TR Zeliang den ajurutepa senden ka amen.
Nagaland State BJP ketdangpur tasen melentepba sülen tan mezüng atema Chief Minister den ajurutep aser iba mapang DAN teloktep sorkar dak sendakba onüktem den ano state indang onük aika benoka lemsatep, ta BJP Nagaland, Spokesman, Yanghose Sangtam-i sangdong ka nung metetdaktsü.
Senden nung BJP Finance Committee Convener, HK Khulu-i State BJP unit tenüng nung Chief Minister TR Zeliang nem tezüluba ka nung onük kar lemsatep aser iba nung telatetba kar yur ang teloktep sorkar tentet, anungji DAN Ministry nung BJP MLA tem nem menden teputep lemzüktsütsüla, ta shia lir.
BJP Nagaland-isa Chief Minister dang BJP party worker tem senzüka meyui mapa balala nung lemzüktsütsü atema mepishia metetdaktsü, ta sangdong nungsa shia lir.
BJP Nagaland-isa chief minister dang tan financial year nung CSS mesüra NEC/NLCPR/ Article 275 mesüra schemes kübok party-i benokba projects/proposals agizüktsü atema mepishi.
Senden nung Chief Minister, TR Zeliang-i BJP Nagaland ketdangpurtem dang tesentaktep tashi itshitsü atema yariteptsü nangzük aser State renloktsü tangatetba nung maneni sorkar den yariteptsü mepishia metetdaktsü, ta BJP Nagaland, Spokesman-isa sangdong nung shia lir.