Nagaland state kümteter küm 57 jungogo

December 1, 2019 nü Local Ground Kohima nung 57 buba Statehood Day amongdang Chief Minister Neiphiu Rio-i march past teloktem nungi salute agiba angur.

Kohima, December 1 (TYO): Naga olemtepertem aser India sorkar tsüngda Naga yimten atema telemtetba ka magiteti lia, tanü Nagaland indang 57 buba Statehood Day ayonga mongogo.
1963 küm Nagaland ya Assam nungi balaka razüka state aküm aser North East nung mezüngbuba state lir.
Deobarnep Khouchiezie, Local Ground nung benjung intiba ayonga amongdang State police, Indian Reserve Battalion (Mahila denür), Special Task Force aser Village Guards-i shilem balala agi.
Talisa, Mahila Pipe Band, NAP Pipe Band, Home Guards & Civil Defence Pipe Band, Police Training School Pipe Band, 10th Indian Reserve Brass Band aser 4th NAP Brass Band tem longjemer band display ka ia sayu.
Maneni, 15 Indian Reserve (Mahila) Platoon-i drill display ia sayudang tesentepertem kanga peladaktsü.
Iba sentong nung Kohima kübok school 12 nungi kaketshir 1060-i “God Bless Nagaland” ken aten.
Nagaland Chief Minister Neiphiu Rio aser Deputy Chief Minister Y Patton nati anir Cabinet Minister aser Advisor tem, Chief Secretary Temjen Toy, police aser paramilitary ketdangser aika benjung nung aden.
Taoba India Tir Dr. Sarvepalli Radhakrishnan-i 1963 küm Nagaland ya India nung state 16 buba ta sangoktsüba kasa Khouchiezie nung tanü Chief Minister Rio-i “asen state kümtetba nung tajung aser tajung atalokbatem tanü bilemteter” ta ashi.
“Mangdang aketba lennirtemi par mapang bendanga agüja aser akangakangka noktakba ajanga Nagaland state ya asangsang nung kümtetogo” ta Rio-i ashi.
“Naga yimten latettsü atema tanü tashi mapa inyaka arudar aser Naga Yimten Telok balala aser India sorkar tsüngda olemtep tembangogo. Asenoki tanü otsüsütsü tatalokba ka ajurutsü kikümbang nung noktaka lir aser tatembang telemtetba agitsü mapang tatonger ama bilemer” ta paisa metetdaktsü.
State sorkar tenüng nung Chief Minister Rio-i olemteper ajak dang pelaba metetdaktsü.
Naga nungertemi tatembang telemtetba ka agitsü atema merangdang sorkaria kechisarena ajaklen state renlokdaktsütsü aser tejakleni aotsü atema nangzükba ama inyaker. Sorkari gari lenmang, Power & health sectors aser human resource development wadangtem atema temulung kanga agüja inyaker, ta CM Rio-i ashi.
“Naga nunger atema tsünüsenbongtsü ya kanga tongtipang lir kechiyong nisungtemi inyakba mapa tongtibaji iba ya lir. Dimapur nung aliba North East Agri-Expo site nung Air Conditioned market ka tang teyangludak lir aser iba ajanga aluyimertemi maongka aika angutsü,” ta paisa ashi.
PM-KISAN kübok aluyimer 1,42,603 tenüngtem upload süogo aser parnok indang account nung indangindang sen ajak agi Rs 54.60 crores tashi enoktsüogo, ta Rio-isa shisem.
Sorkari e-governance nung temulung agütsür aser iba atema Nagaland state atema MyGov Nagaland portal lapokogo. Nagaland tobur ajungba ajanga tourist temi kanga sapua semdanger aser iba atema onoki tourism sector tajungba kümdaktsütsü meranger, ta Nagaland chief minister-isa ashi.
“Wadang ajaklen terenlok ngudar. State nung tensa junga ayuba aser yimjung ali nung dang terenlok mapa shitak inyakteter ta asenoki metettsüla” ta Rio-isa ashi.
Taküm November 22 nü India Today Group State of States survey-i Nagaland nem ‘best performing small State in Law and Order’ naroküm agütsü aser iba ya küm ana tashi atongtepa nguogo. Ano, kasa survey ajangasa entrepreneurship & cleanliness nung most improved small State naroküm ngutetogo, ta paisa metetdaktsü.
Linük nung Nagaland ya ajaki sapuba aser terenlok aliba state ka kümdaktsütsü atema tanü asenoki bendanga agütsüshir mapa inyakdi, ta Rio-isa ayongzük.
Hornbill Festival 2019 den külemi Statehood Day amongba atema paisa tesem balala nungi aruba tourist tem pelaa agizükba metetdaktsü.