Nagaland tatar senden nung Naga nunger atema jembir mali : K.Therie

Dimapur, July 24 (TYO) : Nagaland nung alir nübortem atema tia majung kaji nübortem nüngdak aser timtemba indang jembitsür Nagaland state tatar senden nung shinga mali, anungji tan tatar senden nung Nagaland angh-i par sorkari inyaktetba aser inyaktsü jembiba onük nung shingaia mashishii atemtsü aser MLA 60 pronglai pa nüng sanga sorkar sen ajak parnoki agitsü ta Nagaland Pradesh Congress Committee tir Wb.K.Therie-i metetdaktsü.
Nagaland angh-i nübortem dang ochishia ashi nungbo, ” ozü sorkar sentongji gari tajung alir lenmang tamajung nung senzütsü.’ Kohima nung alirtemi tzü koma angur aser gari koda nungteper, aji meteta lir. Dimapur nung alirtemi light koma arur aser gari taolen mali koma timatemer, aji meteta lir.VDB Secretaries aser Chairman-temi MGNREGA nungi sen koma angur,Civil supplies nungi jangotsü koma angur, aser tanga Centrally Sponsored Schemes nungi teyaritem koma anguar meteta lir, ta ashitsüba liasü ta paisa ashi.
Shitakba agibo, tatar senden nung jembidang, anghi NPF-BJP DAN sorkari inyaktetba indang ashidang, minister aser MLA-tem pei ki chuba ki ama yanglutepba, ali aliba, hotel lapoktepba, business tapu balala bener arua inyakba, industry aser power station pei meyong akümbatemjiang ozü sorkari inyaktetba terenlok mapatem lir ta ashitsüla ta Congress lenirisa ashi.
Paisa sorkar aija ashidang, anghi shitakba agibo ozü sorkari Medical College, Engineering College aser Nursing College amalatem lapoktsü nangzükba meinyaktet saka ochimashi aser tejak repranga technical seats agütsüba, sorkar mapa nung mashilen nungi shimba, nisung tiyazü tenüng nung mapai idaktsüba, nisung mali ser ita asen agitsü atema mapa inyakdaktsüba, tiyazü pensioner-tem, mapa tim mesüi lemzüktsüba, Civil Supplies ajanga aruba chiyongtsütem miima yokdokba amala mapatem junga inyakogo ta ashitsüla ta metetdaktsü.
Angh-i nübortem dang ochi ashitsüla saka tang tatar senden nung jembiba o yabo tiyazü agi sünga lir ta NPCC tirisa metetdaktsü.