Nagaland tatar senden tembangogo

Kohima, July 14 (TYO): Tanü Nagaland Assembly Speaker, Chotisuh Sazo-i  anogo asemnü Nagaland tatar senden tembangtsüogo.
Tzüngluruwa tatar senden (monsoon session) ya Mongolbarnü tenzüka liasü aser iba mapang nung House-i Nagaland Lokayukta Bill 2015 atema Assembly Select Committee mendenbuba aser züngsemtem nem ano mapang atsülangtsütsü lemteta parnok dang ita trok tsüngda osang agütsütsü atema tetuyubatem agütsü.
House-isa bill tasen ana agizük- St. Joseph Catholic University (Nagaland) Bill 2016, aser Nagaland Appropriation (No. 3) Bill 2016 iba den amended bill – Nagaland Salaries, Allowances and other facilities of the Members of Nagaland Legislative Assembly and Pension for ex- Members (Fifth Amendment) Bill, 2016 agizük.
Bill No 3 ajanga, March 31, 2012 tashi atema Consolidated Fund nungi sen crore 54.94 agizüktsü asoshi state sorkar nem tashi agütsü. Iba Bill nükjidong ya, 2011-12 küm sen tali endokba atema lir.
Salaries and allowance fifth amendment bill agizükba ajanga tang temendak MLA 60, taoba MLA 141 aser MLA family pensioner 87 itasen aser allowance tur angutsü. Tang ita ka nung parnok nem agütsüba sen ajak agi Rs.90,94,500 adoker aser tang amendment bill agizükba ajanga tang nungi ita nung parnok asoshi sen 1,57,30,000 endoktsü.
Iba Bill ya state Angh-i agizükba anogo nungi tenzüka mapa akümtsü.
Chief Minister, TR Zeliang-ia Nagaland Department of Underdeveloped Areas Service Rules, 2016 benoka liasü.