Nagaland tatar sendeni 2015-16 küm atema sen crore 12592.69 latet

Kohima, Jul 27 (TYO) : Tanü Hombar nü Nagaland Legislative Assembly nung taküm 2015-16 küm asoshi senotsü sentong nung sen Rs 12592.69 crore endoktsü lateta yuogo.
Nagaland nung tatar ajak NPF teloki aniba DAN sorkar nung adenba sülen ibai mezüngbuba senotsü sentong asütsü.
Iba senotsü sentong nung senotsü endoktsü nüngdakba ken o 82 liasü aser item ajak nungji kecha tasüngdangba melii agizüka yuogo.
Iba budget ya Nagaland Appropriation (No. 8) Bill, 2015 ajanga Nagaland State Consolidated Fund” nungi 31st March 2016 tashi sen Rs 12592,69,47,000 agizüka amshitsü tashi agütsüogo.
Iba senotsü sentong ya July 23 nü tatar senden nung Chief Minister TR Zeliang, shibai Chaplee kilonser mapa dena repsema bena lir, pai renema bener arua benokba liasü.
Iba küm nung nüngdakbatem inyaka aodang sen Rs. 1426.29 crore agi meperitsüsa iba senotsü sentong ya benoka agizükogo.
Zeliang-isa ashiba agi, taküm senotsü arutsü asoshi asadangtetbaji sen Rs 12,041.83 crore asütsü aser teindokbaji sen Rs. 13,349 crore asütsüsa senotsü yanglua lir.
Iba senotsü sentong agizükba sülen NLA Speaker Chotisuh Sazoi senden tatem küma shibang.