Nagaland tatartem senden tembangogo; GST Amendment Bill agizük; Indo-Naga yimtenren ken o atema bangzüng ka renemogo

Rongjui/September 20, 2018 nü 13buba Nagaland tatartem senden nung Chief Minister, Neiphiu Rio-i jembiba noksa nung angur. Kohima, Rongjui/September 20, 2018. 

Kohima, Rongjui/September 20 (TYO): Yangtepnü/Brihostibarnü Nagaland Legislative Assembly (NLA) senden tembangogo, aser senden nung Naga nunger ajak yimsüsüba ka kübok alotsü atema Naga nunger aliba tesem ajak longjemtsü asoshi bangzüng ka arenem.
PDA aser Opposition NPF MLA 26 densema MLA 60 pronglai teka makanga iba bangzüng agizüka liasü.
Tanep tatartem senden nungsa voice vote ajanga Nagaland Goods and Services Tax (Amendment) Bill, 2018 agizük; iba bill ya Sangtennü/Mongolbar Chief Minister, Rio-i senden nung benoka liasü.
Tanü senden nung India-Naga simtenren ken o dak sendakba nung Assembly bangzüng renemba ya Nagaland Assembly-i iba ama bangzüng 6buba renemer asütsü. Tamalen
1964, 1970, 1994, 2003 aser 2015 kümtem nunga assembly nung India-Naga yimtenren ken o dak snedakaba bangzüngtem renema liasü.
Iba bangzüng agizüka züngsemtemi Naga yimtenren ken o ajaki akhümketa agizüktettsüsa latettsü asoshi tesüiba küm aika Naga nungeri tenla agüja inyakba atema pelaba metetdaktsü.
House-isa Naga nunger ajak ang longjema alitsü aseer tang yimtenren ken o tejembidak nungita shilem agitsü ayongzük.
House-isa ken o jembiba nungi atsünga aliba Naga yimtenren teloktem dang yimtenren ken o tekaraba nung latettsü atema ken o jembiba nung adentsü mepishi.
House-isa Luroi/August 3, 2015 nü Framework Agreement agiba aser Yimpoksüi/November 17, 2017 nü Naga yimtenren teloktem den tezluba nung tezüngzüktepo agiba atema ken o jembiba telok ajak, talisa Ato kilonser, Narendra Modi leniba nung India sorkar dang pelaba lemsatep.
House-isa India sorkar dang India-Naga yimtenren ken o ya küm 70 dak tema lir aser tesüiba küm 21 tashi aken o jembia ardar, anungji tekaraba nung ajaki akhümketa agizüktettsüsa yimtenren ken o latettsü atema inyakdaktsüner, ta mepishi.
Tanep iba bangzüng magizükdang o lemtepba mapang nung Opposition Lenir, T R Zeliang, NPF MLA tem – Imkong L. Imchen, Kuzholuzo Nienu, Chotisuh Sazo, Yitachu, C L John, Vikheho Swu, Muthingyuba Sangtam, Independent nungi Minister Tongpang Ozukum, BJP nungi Minister Temjen Imna Along den MLAs Kashiho Sangtam, Mmhonlumo Kikon, aser NDPP MLA tem Toshiwongtung, Pohwang Konyak, K T Sukhalu aser JD Minister G Kaito nungeri Assembly nung bang züng renemba kija agidangbo Naga yimtenren ken o latettsü makok, ta jembia liasü.
Parnoki ashiba agi, Joint Legislators Forum nung state nungi MP ana adentsüla aser telok tila aika kümer Naga yimtenren teloktem, lokti tentettem aser melungtet teloktem ajurua longjemdaktsütsüla, aser ola ka ser sorkar dang iba ken o tekaraba nung latettsü atema akhangtsüla.