Nagaland tatartemi ato kilonser den Naga yimten ken o jembi

New Delhi, July 16 (TYO) : Nagaland Chief Minister T.R Zeliang aser Speaker, Chotisuh Sazo nati anir Naga yimten tebilemtsü onük jembitsü shimtetba Nagaland Parliamentary Working Committee nung züngsem 17 dena oagi New Delhi nung, tanü Brehostibar nü ato kilonser, Wb.Narendra Modi ajurua pa nem tezüluba nung Naga yimten tebilemtsü ken o ya yaktasa latetdaktsüner ta temepishiba ken o ka agütsüogo.
Naga nungertemi Nagaland nung yimjung aginür aser terenlok mapa takok ngua inyakner, anungji India sorkari Naga yimten tebilemtsü latettsü asoshi shisa tajung agüja tekaratiba nung teti asoshi telatetba kati arutettsüsa inyakdaktsüner ta Nagaland tatartemi ato kilonser dang shia liasü.
Nagaland tatartemisa ashiba agi, India sorkar o NSCN-K na tsüngda yimjung mapang anentsüsa lemtetba telemtetba ya state sorkari memeteti latet, anungji state nung yimjung alitsü mechi parnok tsüngda ano tanaben yimjung mapang lapoktsüsa inyakdaktsüner ta Nagaland tatartemisa metetdaktsü.
Parnokisa ato kilonser dang, tang ama Nagaland nung yimjung nüngdaka aliba mapang, Armed Forces Special Power Act (AFSPA) amshia Nagaland ajunga ‘Disturbed Area” asütsü lemtetba jagi tebilemtsüang tali adoktsü, anungji Naga yimten tebilemtsü ken o latettsü atema inyakba maparen nung Naga nungertemi temulung lemtettsüsa, Nagaland ajunga ‘Disturbed Area” kümdaktsüba AFSPA ozüngji Nagaland nungi agientsüla ta metetdaktsüogo.
Nagaland tatartemisa ashiba agi, tang tashi nung Naga yimten tebilemtsü lalettsü asoshi Naga yimten teloktem den yimjung lapoka jembiaka, India sorkari Naga yimten tebilemtsü ya yamai latetdi ta tebilemba kecha shidanga mali, anungji tekaratiba nung telatetba kati arutettsüsa India sorkari tebilemba ken o benoktsüla.
Koba telemtetba südir süaka, nübortemi agizüktet nung dang telemtetbaji takok ngua aotsü alinung, Naga yimten tebilemtsü latettsü merangba mapa nung Naga nunger lokti tentettemi shilem agibaji junger aser tatartemi akok tashi shilem agiba ajanga yimten tebilemtsü ken o ya letettettsü imlar ta ato kilonseri ashi.
Naga yimten tebilemtsü akoktsü asoshi inyakba nung Naga nunger shia shilem lir aser koba tebilemtsü südir süaka ken nungbo ajakbo makoktsüa akok, anungji telatetba kati aru tenzüktsü atema Nagaland tatartemi tatem tashi nungitdaktsüner ta Narendra Modiisa metetdaktsü.
Tanü Nagaland tatartemi ato kilonser ajurua jembiba senden nung National Security Advisor, Ajit Doval dena liasü.
Parnokisa ato kilonser majuru dang tamasa Naga yimten ken o jembibaren nung India sorkar tenüng nung jembir, R.N.Ravi ajurua liasü. Iba mapang, pai Nagaland tatartem dang taküm kümsa Naga yimten tebilemtsü ken o ya telatetba katibosa arutettsü atema akok tashi len sayua yaridaktsüner ta metetdaktsü.