Nagaland tejakleni aotsü atema shisaluyimba rejutem shilem tulu lir

Dimapur, October 24 (TYO) : Nagaland tejakleni aotsü atema Nagaland University den tanga shisaluyuimba rejutemi shilem tulu agitsüla, ta Nagaland aser Assam Angh, P.B Acharya-i ashi.
October 24 nü St. Joseph’s College Graduation Day 2015 sentong nung tongti tesemdanger o jembidang pai iba onük jembi.
“Iba tobur tajung tesem aser college infrastructure tajung angudang ni kanga süngmanger. Iba college ajanga shisaluyimba mapa junga inyakba aser kaketshir tajung aika adokdaktsüba atema tenüngsang agütsür. State ka mesüra linük ka tejakleni aotsü asoshi shisaluyimbaji kanga tongtipang” ta paisa ashi.
Angh-i ‘skill development’ nung tongti süa jembidang ashiba agi. “Centre sorkari linük nung kaketshirtem skill development atema sentong atongogo aser iba asoshi sen crore 30,000 lemzüktsüogo.”
Shisaluyimba rejutem nung skill based education sayutsü aser ibaji ajanga kaketshir shia skill ka ka shidaktsütsü atema Centre-i iba telemtetba agi. Iba inyakyim ajanga linük asoshi tajangzük tulu bener arutsütsü, ta PB Acharya-isa ashi.
Tanü sentong nung Angh-i takok anguba kaketshirtem nem sempet lema agütsüdang ashiba agi, taruba academic session nungi Mahatma Gandhi , Dr APJ Kalam aser Dr T.Ao nunger nüngtem nung Academic, Sports aser overall performance sempettem agütsütsü.
St. Joseph’s College Graduation Day 2015 nung B.Com, BA , BSC, aser BBA streams nungi kaketshir 208 graduate süogo.