Nagaland tensa kanga junga kümogo: CFMG Chairman

Kohima, April 26 (TYO): Nagaland nung küm ka shi armed forces aser Naga telungpur teloktem tsüngda khatepba lendong majurui arur, ta Hokolbarnü Ceasefire Monitoring Group (CFMG) nung Chairman Lt Gen (retd) Shokin Chauhan-i ashi.
Tanü Kohima nung aliba State Guest House nung osangbener den jembidang Chauhan-i “ni CFMG chairman mapa benzüka inyaktsü tenzükba sülen taoba ita 8-10 shi ka nung khatepba tatalokba kecha mali, tensa süngjema dang arur” ta ashi.
Election mapang ceasefire ground rules nung lateta aliba ama inyaktsü mepishiba ama teloktemi (NPGs)-i April 11 nü Lok Sabha polling mapang tashi anga, ta paisa metetdaktsü.
Nagaland den kidanger state tem nungbo telungpurtemi meinprong saka Nagaland nungbo timtem kecha majuru, ta Chauhan-isa shisem.
CFMG-i ceasefire rules alema inyakba mapa ajema kümdaktsüogo aser tangbo security forces o Naga teloktem mesüra NSCN teloktem tsüngda raraba mali kümogo. Iba ya Nagaland nung alirtem atema kanga tongtipang lir, kechiyong rara anen nung dang yimjung alitsü aser army-ia ki aser shishilembadak mita aoba mapa anentsüla, ta paisa metetdaktsü.
Naga telungpur telok aikati tashiyim agi sen meshiba onük atema asüngdangdang “Telok balala den review senden amendang iba onük benoka lemsateper, saka parnoki ashiba agi iba ya tashiyim agi sen meshiba masü saka ‘voluntary donations’ lir. Nisung shingaia iba dak sendakba ken o mebenok nung ni kodaser mapa inyaktsü?” ta Chauhan-i meyiper asüngdang.
Ceasefire ground rules ajanga telok shingaia amokmeren masütsü aser tashiyim agi sen memeshitsü tuyur anungji iba dak sendakba onüktem lir, office-i arua osang lemsateptsü ayongzüker, ta paisa shisem.
Centre aser NPGs tsüngda yimjung olemtep atema osang metetnüa asüngdangdang, “ni cease fire rules ketdangsüa reprangtsü atema dang mapa lemzüktsü anungji ni iba tasüngdangbaji melangzütettsü” ta CFMG Chairman-i ashi.
“Ni olemtepba nung shilem kecha mali, saka security forces aser NSCN telok pezü- NSCN(IM), NSCN(K), NSCN(R) o NSCN(KN)-i CF violations mita reprangtsü atema dang mapa inyaker” ta pai ashi.
NNC teloktem dang Centre den ceasefire alitsü atema CFMG-i ajuruteptsü asü masü ta osangbeneri asüngdangdang “parnoki ceasefire linüra onok dangi arutsü akok saka onokibo parnok den ajurutepi maotsü” ta Chauhan-i langzü.