Nagaland tesem balala nung takok ngua mokdangogo

Kohima/Dimapur/Mokokchung, February 13 (TYO) : Nagaland Tribes Action Committee (NTAC) Kohima-i state yimtiba nung ghonda 12 mokdangtsü ayongzükba tiptema agiogo.
Kohima nung aliba Naga kin telok balala nungi aser ano yimtsüng balala nungi nübotemi Angami Youth Organisation (AYO) lenisüba kübok Kohima tesem balala nung mapa lemzüka mokdangba nung shilem agi.
Tanü garitem mesenzü aser State Civil Secretariat o Assembly Secretariat dena sorkar office tem, shishilembadak aser shisaliok rejutem ka danga melapok.
NTAC Kohima aser JCC nati Chief Minister TR Zeliang dang menden toktsütsü takhangba agütsüba tashi mangaba atema mokdang ayongzüka agir.
Nagaland nung tetsür nem shilem 33 lemzükja Urban Local Bodies (ULB) election indang maparen inyakba ajak meyipa agiang ta NTAC-i akhangba ama sorkari mapa inyakogo. Tanabuba nung, January 31 nü Dimapur nung lanur ana kahsetba lendong nung sendaka aliba police tem mapa nungi anenjang ta parnoki takhangba agütsüba ama meinyak lir, kechiyong police temji mapa nungi manentsü saka belener dang ao.
Ajisüaka, NTAC Kohima aser JCC nati Chief Minister dang menden yujang ta akhangba nungi masetshii nokdaker.
Nisung aikati mokdangbaji tanü atema dang asü ta terata ka nung liasü saka NTAC Kohima-i, mokdangbaji maneni alitsü saka Kohima nung mapang jibo AYO ajanga lemtettsü ta iba terata jangjashitsüogo.
Angami Youth Organisation (AYO)-ia sangdong ka nung NBSE tatidang aliba agi kaketshirtem tenokdangba kübok maitdaktsür ta metetdaktsüogo.
AYO-isa shishilembartem dang public nüngdak peritsütsü atema nikongdang 3:00 ako nungi dokantem lapoktsü mepishia metetdaktsüogo.
Nikongdang 3:00 ako tashi garitem mesenzüdaktsütsü saka kaketshir atema bilemja, tatidang agütsürtem senzüsenbongtsü atema public transportation, bus, taxi, sumo aser nija garitem senzütsü akok, ta AYO-isa sangdong nung shia lir.
Tatidang ketdangsüa reprangba department ajak tenokdangba kübok maitdaktsütsü saka parnoki sorkar indang garitem mamshitsüla aser tzü abenba garitema anepdang 9:00 ako matongdang aser nikongdang 3:00 ako sülen ang senzütsü melar, ta AYO-isa shisem.
Dimapur nunga tanep 8:00 ako nungi nikongdang 5:00 ako tashi mokdanga liasü aser iba mapang sorkar office tem, bank, shisaliok rejutem aser shishilembadak ajak shibang.
Tanü Dimapur nung tetsürtem dena nisung noklang aika pei kin sübotsütem agir tongtipang tesemtem nung mokdangba sentong nung yaritepogo.
Kaketshirtem atema bilemja JCC-i February 14 nungi tenzüktsü aliba NBSE tatidang agütsütsüpur aser ketdangsertem atema tenokdangba salatsüogo.
JCC-isa Dimapur nung train aser tayimtsü ajanga senzüsenbongertem dang mokdang metenzükdang rail station/airport atongtsü metetdaktsüogo. Tangalen nungi arurtema nikongdang 5:00 ako nung mokdang tembangba sülen ang rail station/airport nungi yoktsü ta parnokisa shisem.
Ao Senden JCC-i ayonga Mokokchung nunga anepdang 6:00 ako nungi nikong 6:00 ako tashi lendong timtem kecha mataloki mokdang sentong tipdema liogo.
Nagaland Tribes Action Committee (NTAC) nungi teteyuba tasen ka maru tashi Feb 14 nüa kasa akhi ama mokdang sentongji alitsü, ta Ao Senden JCC-isa metetdaktsuogo.
Item telok ya mokdang dak sentakba nung maittsü; tatidang agütsürtem, tesayurtem (invigilators); magistrates on duty, police aser paramilitary; Press & media personnel; hospitals & pharmacies.
NTAC Kohima aser JCC tetuyuba kübok Chakhesang Youth Front (CYF)-ia tanep 6:00 ako nungi nikongdang 3:30 ako tashi Chakhesang litsü mokdangogo, ta sangdong ka nung metetdaktsü.
CYF-i Phek, Pfutsero, Chozuba, Chetheba, Chizami aser Sekruzu jila nung mokdang tiptema ayongzüka agi. Maneni, February 14 anepdang 6:00 ako nungi nikongdang 3:30 ako tashi mokdangtsü, ta parnokisa metetdaktsüogo.