Nagaland tesem balala nung ‘World Youth Skill Day’ mungogo

Dimapur, July 16 (TYO) : July 15, 2015 nü APO Hall, Kohima nung ‘World Youth Skill Day’ amung aser iba sentong nung tongti tesemdangerji Commissioner & Secretary, F.P Solo liasü.
Sentong nung F.P Solo-i lanurtem dang parnok dak aketba sempet renlokdaktsütsü aser technical skills ajungkettsü ayongzük.
India nunger lanur dak skills development tapu balala lir aser alima tesem ajak nung mapa inyaker. Linük den aliba lanur asadangtep asüba ajanga Nagaland nung lanur timba lir ta bushitetogo. Asen state nung lanur tazünger aika department balala nung mapa inyaker saka ano zünger mapa mangur aika lir. Anungji industry aser department nung nüngdakba ama lanurtem technical, vocational aser education nung tim tesayuba agütsütsüla, ta Solo-isa ashi.
Nagaland nung tazünger noklang nung shilem 84-i Arts aser shilem 15-i dang Science azünger. Anungji, asenoki iba ya kanga junga shisadangtsüla aser Science o Maths azüngtsüla, kechiyong iba nung mapa inyaktsü atema technical skills aika lir, ta paisa ayongzük.
Mokokchung: Mokokchung nunga World Youth Skills Day sentong nung Mokokchung DC, Sushil Kumar Patel tongti tesemdanger liasü.
Iba sentong ya Government Industrial Training Institute, Marepkong nung agi.
Nagaland state nung alir lanurtem dak sempet aika lir anungji itemji kanga metettsü merangtsüla aser state renloktsü atema inyakba mapa nung parnok nem shilem agitsü maongka agütsütsüla, ta Sushil Kumar Patel-i ashi.
Government Industrial Training Institute nung training agirtemi mapa shitak inyaktsü atema angazüktsüla, ta paisa ayongzük.
Sentong nung Mokokchung ADC, Rajesh. S-ia training agirtem ayongzüka jembi.
Iba anogomung nüngtem nung Swachh Bharat Mission mapa inyak aser DIO, NIC Er. Temsuwati-i iba mapang o jembi.
Sentong nung ITI Mokokchung, principal, Er. Imlisunep-i tesentepertem pela agizük aser sentong tembangba sülen Prime Minister Narendra Modi-i New Delhi nung Pradhan Mandri Kaushal vikash Yojana (PMKVY) lapoktsüba sentong television nung reprang.
WOKHA: Bodbarnü ITI (Industrial Training Institute), Wokha Office complex nunga “Skill India Mission” tenzükba sentong agi.
Sentong nung tongti tesemdangerji Wokha Deputy Commissioner, A.Robin Lotha liasü aser training agirtem ayongzüka jembi. Paisa Hairailiang Zeliang aser Nyanbemo Lotha (V.I. Instructor) nem Trainee aser Trainer tajungtiba sempettem agütsü.
Sentong nung Wokha Principal, ITI, Er. Nyaksham Phom-i skill development & entrepreneurship indnag onük jembi aser Prime Minister Narendra Modi-i National Mission for Skill Development lapktsüba live telecast reprang.
MON: ITI office, Mon nunga Mon Deputy Commissioner, W. Honje Konyak tongti tesemdanger ser World Youth Skill Day mungogo.
Tanüngba Naga nunger kin dang nungi Konyak nunger dak nübo agüja mapa inyaktsü tashi lir aser asenoki asen tetsütebou nungi anguba sempettem amshitsü shira, asenoki mapa tulu inyaktettsü, ta Honje Konyak-i training agirtem ayongzüka jembi.
Sentong nung Lecture DIET & IMC, Chenkang-i World Youth Skill Day indang onük jembi aser DIET principal, Alongse Sangtam-i tesentepertem pela agizük. Tatem nung R. Wangpoh UDA, ITI Office, Mon-i anküp tepela o jembi aser iba sülen Pradhan Mantri Kaushal Vikas Yojana (PMKVY) live telecast reprang.
Tuensang: Tuensang nunga Industrial Training institute, Tuensang-i World Youth Skill ayongzüka agiogo.
Iba sentong ya GITI Conference hall nung agi aser tongti tesemdangerji Tuensang Deputy Commissioner, Alemjongshi liasü.
Training agirtemi temulung ajak agi angazüktsüla aser peii angazükbaji tarutsü nung pei taküm liyonga otettsüsa amshitsüla. Skill ta asüba ya inyakba ka dang masü saka shisatsü nung aser nisung ka taküm nung tongtipang teinyaktsütem ajak densema lir, ta Alemjongshi-i tayongzükba agütsü.
Iba sentong nung Bread Basket kibur, Chingmak Chang-i pa sasa meranga inyakba, timtem ajuruba aser alizüng tongtetba indang osang metetdaktsü.
Paisa kaketshirtem dang nendaka agüja merangtsü aser ibaji ajanga jenjang temaba atongtsü ta ayongtzük.
Sentong nung GITI Principal-i Skill Mission indang osang metetdaktsütsü aser Deputy Commissioner-i takok angur nem sempet lema agütsü.