Nagaland Tourism Department-i WTD among

Kohima, Rongjui/Sept. 27 (TYO): Hokulbarnü Nagaland Tourism Department-i “Tourism & Peace” omen kübok Directorate of Tourism, Kohima nung United Nations World Tourism Day munga liasü.

Iba anogomung nung Explore Nagaland nem Best Tour Operator, Petezhapu Meyase nem Best Tour Guide aser Campsite Yedikha nem Best Campsite sempet tem agüja liasü.

Sentong nung Tourism Joint Director, T. Kakihe Sumi-i “Tourism and its significance” onük nung ajemdaker jembidang, tourism industry ajanga employment aser economic development agütsür, ta ashi.

State nung rural tourism aser ecotourism temaba jenjangi ajungkettsü nüngdaker, anungji state nung aliba nüburtem lungjemer inyaktsüla, ta pai ayongzük.

Tourism Deputy Director, Toka E. Tuccumi-i UN Secretary General António Guterres indang message azüngba mapang, “Sustainable tourism ajanga nübur takum melenshitsütsü, mapa adokdaktsütsü, rongsenketzüng tashi itdaktsütsü,” ta ashi.

Sobaliba aser natural heritage wazüka ayuba ajanga mangatettep ajemdaktsür aser yimjung adokdaktsür, ta pai ashi.

Tourism ajanga kidanger tsüngta rongsenketzüng tsütsü kati ka dak metaloka alir, amaliteptsü ajungmesor aser tesunep yangerdaktsür, ta Secretary General ajanga ashi.

Nagaland Association of Tour Operators (NATO) tir Kejaroko Pieru-i jembidang, World Tourism Day ajanga global tourism map nung Nagaland wangshidaktsütsü asoshi arok tejangraba sayur, ta ashi.

“Tourism ya kija atema masü. Ibai arok ajungtsü asoshi lir. Iba yagi mapa adokdaktsür, local ecomony jungdaktsür, aser sobaliba tsütsü tesendaktep lidaktsür,” ta pai ashi.

State nung tourism industry ajungkettsü asoshi sentong tajung nüngdaker, nükjidong tajung ayutsüla, skills development nung rangloktsüla, ki o jen junga anepalutsüla, ta pai ashi.

“Tarutsü nung Nagaland ya tourism hotspot ka kumdaktsütsü asoshi sorkari temulung agütsütsü imlar, kong alima tesem balala nungi adenshia asen sobaliba tajung sayutsü maongka agütsütsü,” ta Pieru-i ashi.

Paisa tourism industry tajungba akumtsü atema sorkar, operators aser nüburtem lungjemer inyaktsü nüngdaker ta ashi.

Nagaland Tourism Association (NTA) tir Vimeto Vakha-i omen nung kongshia jembidang, asenoki alima nem kishi lapoktsüdang aser lima tebour ajungba, sobaliba senmang tajung tarutsü putu asoshi wazüka yutsütsü ashir, ta ashi.

Tourism ajanga maongka balala agütsür, saka junga wazüka ayutsü asoshi asenok mapa lir, ta pai ashi.

Tebilemtsü tulutibaji Nagaland nung tourism infrastructure shidak mali, aser tesem tajung aika lenmang majungba yong tonga moteter, aser anisüngzüktsü ki o jen peria mali, ta pai ashi.

Item timtem ajanga Nagaland nung ecotourism tesep akumtsü jenjang liaka tourists atsür maruteter, ta ashi.

Ibai lenmang yangluba kisüng masü, saka asen lima benzüi arurtem atsür arutsüsa ki o jen tajung nüngdaker.

“Department, local tour operators, hoteliers, lenirtem aser environmentalists tsüngta sensaksem tajung nüngdaker,” ta Vakha-i ashi.

Iba sentong nung Tourism Deputy Director Orenponi Tungoe menden liasü, Tourist officer Lentina aser LDA Neisievinuo nati temeja ken ka aten aser Tourist officers Kheto aser Agumbe Nring nati tourism quiz agi aser UDA Tourism Department Azhanuo-i sentong tembanga sarasadem.