Nagaland University Lumami nung national seminar akar

Noksa nung Tetushi tesemdanger Prof. Pramod Tandon (tiyong)-i ‘Advances in Biological Science Research’ indang abstract kaket ka sayatsür külen sentong nung shilem agirtem den külem tangokba aser M. Sc kaketshirtemi ken ajanga shilem agiba noksa nung angur.

Lumami, February 28 (TYO): ‘Advances in Biological Science Research’ onük nung ajemdaker national level shisatokden sentong ka Nagaland University Lumami nung kadaki. Iba sentong ya Department of Botany, N.U Lumami-i ayongzüka akar. Iba sentong nung India tesem balala nungi shisalen sayur aser shilem agir mongin aika arua dendaki.
Mongulbarnü iba shisatokden tenzükba sentong nung tetushi tesemdanger Chief Executive Officer, Biotech Park, Lucknow Prof. Pramod Tandon-i jembidang, North-East Region (NER) ya sobaliba, oshioben, yimsüyimpong nung takar aser taküm aliba shiruru aser süngdonglidong jenti aliba tesem ka lir, ta ashi.
North-East nung ya tangalen bulua manguba süngdonglidong aser shiruru aika lir. Itemji wazüka aser kümzüka ayutsü kanga tongtibang, kechiyong itemji asen rongsen lir. Itemji wazüka ayutsü asoshi talisa nüburtemi angatettsüla aser ajaki iba nungji shilem agitsü nüngdaker, ta paisa inyakdaktsünüba olen ka ashi.
Anogo shia alima yimya balala ajanga asen jakdang tayongzükba aika ajurur, itemji shisashirtemi shisa tarokba bushia anepalutsü nüngdakba indang paisa kuli kar bener arua lemsatep.
Süngdonglidong aser arem tapu balala nungi rongsen arulen ngujem aika lir. Ajisüaka, asenoki itemji junga ketdang mesüteter. Anungji, item nungji temulung agütsütsüla aser shisa tarok bushia iba jagi rongsen kümdaktsütsü asoshi paisa ajungshia liasü.
Tangalen ama North-East nunga kaketshir/shisashir tajung aika adokdaki, saka parnokji ajungmesoba nüngdaker, ta paisa ashi.
NER nung ya mozü yangluba jenjang aketba süngdonglidong aika lir, itemji bushia renloka bener aotsü asoshi paisa shisem. Prof. Pramod Tandon-isa ‘Advances in Biological Science Research’ indang abstract kaket ka dena sayatsü.
Sentong nung NER-BPMC, DBT, New Delhi Senior Consultant Dr. Pawan Sharma-i Department of Biotechnology (DBT) Govt. of India-i North Eastern Region nung maparen balala inyakba indang kar power point ajanga lemsatepa liasü.
N.U Vice Chancellor bena alisang Prof. N.S Jamir, Organizing Secretary Prof. C.R Deb, Head of the Department (Botany) Dr. Talijungla, Dr. A. Paul nungeria sentong nung shilem agia tepela o den tayongzüka o balala jembi. M. Sc kaketshirtemi ken tajung ka tena sentong lemladaktsü. Iba sentong ya March 1, 2017 tashi alitsü.