Nagaland Water Policy (NWP) document agütsüba sentong agi

February 2, 2016 nü de Oriental Grand, Kohima nung Nagaland Chief Secretary, Pankaj Kumar IAS aser APC Nagaland, Imkonglemba IAS na den GIZ ketdangsertem Nagaland New Policy document agütsüba sentong nung agiba noksa angur.

Dimapur, February 2 (TYO) : February 2, 2016 nü de Oriental Grand, Kohima nung Nagaland Water Policy (NWP) 2016 document sorkar ket nung agütsüba sentong agi.

Iba sentong nung tongti tesemdangerji Nagaland Chief Secretary, Pankaj Kumar IAS liasü.

Pa mezüng Tuensang nung mapa lemzüka inyakdang water conservation asütsü nüngdakba ajitet ta tanü Pankaj Kumar-i o jembidang ashi.

Nagaland nung tzü angudak menena akümba, tsüngsang-mopung melenba aser alima kanga kara ainba ajanga tzü khuret ajurur aser iba jagi Rural Development Department nem water policy yanglutsü mapa lemzüktsü, ta paisa ashi.

Water resources den sendaktepa aliba department temia mezüng policy reprangdangtsü aser iba sülen cabinet dangi abentsü. Taruba budget session nung iba policy ajanga langka kar ajangzüktettsü imlar, ta Pankaj-isa metetdaktsü.

Iba sentong nung GIZ-i Chief Secretary nem NWP document agütsü.

GIZ ya German sorkar indang company ka lir aser NWP yangluba maparen nung parnoki tongti shilem agir.

Iba sentong nung mendenji APC, Imkonglemba IAS liasü aser Commissioner & Secretary, Soil & Water Conservation Department, T. Nungsang-i anküp tepela o jembi.