Nagaland ya kobi melie rakzükraktemer aser auer lima akümtsü

–  I.Meren Lemtur, Tzüdikong.

Tanü alima tejakleni karaa aoba putu ka nung asenok alir ta asenoki jembir, saka iba O ya asen Naga nunger bang nungi adokka jembitsü asenok lima tia agi malang sür nung jembir. Kechiba ta süra, jembiba aser tanü Naga lima jenjang ya reprangdangra tangar tsüngdang tejak metentettsüsa lir. Joko yimtak yimtsüng nung alir alu ayimertemia alu meyimnür,hajira aoertema mapabo tilaba senbo teimba,chi aonbo tajungba asütsüla,kiburi shi ango mesotsüra kibur tu joko rangtong nung tua bener nüngsen jembija tan sürbo par mapai maotsü ta asüba asen nübur lir. Ano Naga nunger hajira walatemi inyaktsü mapa mangur ta jembir, saka tangar tsümartembo shir mapa nungang minyak nübu rakteper. Nie onok Tuli area nung danga asenok Naga nunger mapa inyaka pei yari rongsen angudak kar shisemnür. Tuli area nung dang factory itemi lapoka lir : Tuli nung Tea factory ka lir, saw mill ana lir, Tzüdikong area nung Wameken nunger lushi 10 mile nung tea factory ana, saw mill tilatem mezüngi tulu asem lir, plywood tapu ajak yanglutetba mill tuluka lir, stone crusher pezü tashi laboka lir, Ak farm lapoka lir aser iba dak alaka süngo lu, rubber lu ano farm balala zünger mezüngma Tsüngremer temoatsü asen Naga nunger tangar dang memeshii pei lima nung rongsen peria angutsüsa lir. Iba dak alaka Nagaland tesem ajaklen small industry tapu aika laboka lir, saka item nung inyakerji reprangdangra tetsür tebur labour ajakji tsümartem dang angutsü. Ano iba dak alaka Nagaland nung RCC ki kwi yanglur ajak nung tsümar dang inyaker. Kechiba ta süra, Naga nungerji BABU aser MALIK dang anganüba kin, babu aser malik dang jarbo takitarutsü ajak agütsünüba kin. Talisa Tzüdikong 10 mile nung tsümar bongali nunger nübu raktep dang tera menurbo nübuji mangur.saka Tuli aser Tzüdikong aser temeküt nung alir Naga nungertembo joko hajira aodaka mangur ta kidang moktepa kazüra karbo lir. Tangar tsümartembo hajira sen noklang 250 or 200ji anogo shia angur asü mangur aser tanübo mapa mangu ta shisabulu kecha makai alir. saka asenok Naga nunger asoshiji mezüngbuba mapa tilaba asütsüla,chi basa mechiyungtsüla, süngu jemtsü mayung tajung asütsüla, kechiaser Naga nungeri joko Biscuit ajak agi lakadoker, anogo nung mapa ghonda 8 inyaktsüla saka anepdang menurang aotsü, moko Sali chia sensaksema menteptsü aser yakta sodir hajirabo tsümar anogo ana inyakba sen tu Naga nungerbo kenü hajira meshia bener mapa nungi teshilangi yi ajemertem yi alia bener kidangi shilangtsü. Ano kidang aiür asangurba tubo mobile phone tajungba tu amer kidang mapa kecha meinyaki mungteper.
Iba dak alaka Nagaland Govt-i lanurtem tazünger mazüngertem pei akok mapa inyaktettsüsa Industry ka danga nüburtem asoshi lapoktsütsü bilema mali. Anarongdena Tuli paper mill ka lapok nung tanü tashi tasüa masü, taküma makümer. Iba NPPC ano tanaben shia arua lapoktsü asoshi centre-ibo sen crore aika sanction asüba osang kakettem nung asenok ajaki züngogo, saka item sen ajak lisem nung tzü inoktsü ama samadoker koda kong, koda sür sama tebushir mali aser bushidangyonga kechiba mebushiteter ta süra Discovery aser Geographic-tv chanel nung Molongsongzütemi shiruru tulu nguseter parnok jangratema tebok sünga chir anünga yutsüba shirong aser Hyna nunger arua achiba medem Naga nunger tulurtemi anir tilaba tashi agi tim mesüi ochi mashi rongsen agiba ajanga lir. Iba jagi tanü tashi Yihuda nungri nüktapangtatsür la dak taoner ka danga maliba ama tu tanü Nagaland govt-i iba NPPC asoshi kecha süoki ia mali.Oda temeimtsüka, NPPC nung inyaker workerstem ita terok tashi ita sen mangu timtem tulu agia lidagi. Anungji Naga nunger iba tia ya yimsüsürtemi tenarong tena mebilemdangi yamai dang toktsüra,Naga limaji Khrista asoshi ta asüba melen rakzükraktemer, auer,nisung tepseter lima akümtsü,aser asen kima romal ka danga kima ayutsü makoktsü,kobi melii süngu lu,rubber lu ano tanga farm nung kibur aodangbo auertemi bener oadoker alitsü mapang tonga arudagi,kechiaser Naga nungertemi sashia aginür,saka mapabo minyaknür,süra makara iba melenajibo auyatsüsa dang akümtsü.
Tatem nung item tia ajak ya koda sür yanglushitsü ta süra,mezüngbuba nung asen nüburtemi election ya pei kibong ajangzüktsü atema rongsen bushiba election ka masütsüla.Arung Khristan tajungtem,asenoki 2018 election yabo candidate-tem aser rongsen dak masü Yisu kangki dak rangloker asen lima tasen temerük ka küma yanglushitsü atema arogo aser lokti tentet balalai ayongzükba nung nübur ajaki tashi angaa anidaktsü bilema CLEAN ELECTION-ji atalokdaktsüdi ta ayongzüker.