Nagaland ya lendong atalokba tesem ka lir: OSD NSDMA

Kohima, Luchii (December) 12 (TYO): Nagaland ya alima lendong kanga atalokba tesem ka lir, kechiyong küm shia lendong balala ataloker, ta Nagaland State Disaster Management Authority (NSDMA) nung ketdangser kati ashi.
Tsüngsang-mopung ajanga adokdaktsüba lendongtem ajanga terenlok maparen nung tetsükdaktsü ajurur, ta NSDMA nung OSD Johnny Ruangmei-i ashi.
Bodbarnü Nodal Officers of Disaster Management from line department indang Orientation Program nung Johnny Ruangmei-i osang metetdaktsü.
Nagaland nung menoknok aser anentsüh, tzümetsüng, yipru, rü tsükba aser tzünglu tulu aruba, tzünglu maru akongba aser morok mi amala lendongtem ataloker, ta pai ashi.
State sorkari khuret koktettsü meranger ajisüaka tesem aika nung takoksa anguba ajanga state ket nung rongsen agi meperir. Department shia pei pei teinyaktsü aser tebilemtsütem lir aser pei indang Disaster Management Plans nung temulung agütsütsüla, ta Johnny Ruangmei-isa metetdaktsü.
Sentong nung Home Commissioner, Ramakrishnan-i okila jembidang “NSDMA-i district shia District Disaster Management Emergency Control Room lapoktsü sentong renemer. Iba ajanga line department ajaki amalitepa mapa inyaktsü akok” ta ashi. Sentong nung Secretary Home Rovilatuo Mor-i tesentepertem pela agizük.