Nagaland ya Nagaland dang tuluba

Naga nunger yimten nüchiso atema raraba ya India yimten kübok alena aliba nungi salatsüba dang masü saka Naga nunger lushi ajak yimten ka kübok bener arua linüba tejangraba lir. Iba tejangrabaji tim dang, kechiyong kibong ka dang nungi jakzükba kin ka ser kodaser kin balala kümer, yimten balala kübok alushi lemdanger, kinunger agi pi kümer alitsü ? Ajisüaka, küm noklangka jakdang alima nung kin aika pei pei kin kümteta aodang, asenok Naga nungertem dak alima temetetba mali aser shisatsü nung main, ano asenok o asenok na ta junga memetettep ta asüba tia ka nung, asenoki asenok asoshi yimten jenjang ka alangtettsübaji mekoki liasü ta tangang rajemer. Iba jagi Naga nungersa süaka asenoki asenoksasa tanüang yimten balala kübok alushi balala tsüngda arr ladanger aliba reprangtetter. Aji oda, asenoki yimten ka kübok asenok kimong lumong ka ser külemi linüyonga, joko, tang tangbo melitettsüsa tensa tia ka nung asenok liadokogo. Ashi, shitakba Naga limabo tang asenok aliba Nagaland state ya dang masü saka tulubalen ka Myanmar nung lir aser India küboksa süaka Arunachal Pradesh, Assam aser Manipur nung Naga nunger aliba lushitemji nisungji dang masü saka alushijia Naga nunger lushi lir. Aji oda, tangsa Naga nunger lushi ajakji Naga yimten ka kübok meyutetaka, asenok Naga nunger shiai asenok koba lima mesüra koba state nung lidir liaka, asenok ya Naga nunger aser Naga nunger li nung alir ta angatetra aser iba tangatetbaji mamadoki senmang küma amanga otetra, ibaji Naga nunger ajak yimten ka kübok ser meputepi aliba dang nungibo noklangben agi tajungba asütsü. Iba tangatetba nung, tamakoktsü ka putusa putu merangdanga amongtsü agibo, khen anener, takok angutsübalen reprangdanger apusoshi nungbo, iba len jagiang yakta tadongtsü ka atongtsüsa anitsü. Joko, tanübo alima ka akümtsüba ya alushi temakazük tilaka ya masü saka alima ajunga ka dang kümogo, anungji asenok kong lidir liaka, asen mapa tajung agi asen alidak limaji asen lima küma alitsübajiang tongtibang aser tenüngdakba lir. Iba tangatetba tsütsü kodang bilemdangdir, yashi July 19 anogo nung America lima New Mexico state ajaklen Khonoma (Angami) nunger Dr. Jonathan (Vilasier) Iralu anogo asütsü ta yimteni ayongzüka amongba mapa jagi US nung New Mexico state-jia Naga lima kümogo ta angateter. Iba kasaji alima tesem kongsa Naga nungertemi Dr.Iralui inyakba amaji alimai pelatsüsa aser metettsüsa inyaker, iba limaji Naga lima asütsü. Dr.Jonathan Iralu ya Khonoma nunger, tebuo-a aser tebua medical doctor liasü, anungji pa yabo Doctor-ba’er jabaso dang masü saka Doctorba’er semchir.Pai New Mexico nung Covid wara tongpang nung nübortem dang meima bendanga agüja anepaluba mapa tajung ngua pelaba tamaitsü New Mexico state yimteni pa tushia iba July 19 anogo ya mongogo. Pa denji kodang asenok Naga lima nung alir Naga nungertem mapa medemdangdir, anüng o ali na tepila amato medemdangtettsü. Asenok asoshibo asen nübortemi tushia anogomong mongtsütsübajibo yutsür, asenok ochimashi aser tashiyim mapatem agi nübortem mulung kanga kuremdakja lir, anungji asen nübortemi asen den külem ser yimten dang masü saka lokti tentet nunga külemi meliner. Tanü asenok Naga yimten onük nung Naga nunger alushi indang jembidang asenok tangatetba ulushia bilemtsü, jembitsü aser inyaktsü asoshi Dr.Jonathan Iralui asenok ajak nem tatishitsü tajung ka sayuogo. Aji oda, pa amaji Naga nunger senso tajung aika maparen tapu balala nung alima tesem ajaklen inyakdagi, item tesemtem ajakji Naga lima amato asenoki bilemdi, süra atangji nung Nagaland ya Nagaland dang nungi kanga agia tuluba asütsü. Asenok atemabo tang asenok aliba Nagaland state ya dang Naga lima amato bilemer, iba jagi asenoki Naga lima tulubalenka mangu aser memetet ser Nagaland tilaka nung ya ali raktepa amonger aser mapa tajung nung nüngtugu akümtsü meranger masü saka mapa meinyaki takar akümba aser mapai mao ita sen achiba mapatem nung nüngtugu akümtsü tokteper amai tokteper.Iba anogomongji shirnokibo mongtsütsü ? Aji oda, New Mexico nung Dr.Jonathan Iralu anogomong amongba amaji, asen lima nung asenoka asen anogomong mongdi asünungbo, kechi ama anogo ka kechi atema amongtsü (?) ta bilemdanga, Naga lima yimten onük aser alushi indang tangatetba ulushitsü nüngdaker.