Nagaland ya süngdonglidong agi sünga kümdaktsütsü jembi

Nagaland Environment, Forest & Climate Change department nung inyaker ketdangsertem den  parnok minister Wb. Imkong L. Imchen-i jembiba noksa nung angur. Kohima, April 13, 2017.

Kohima, Apr 13 (TYO) : Nagaland ya süngdonglidong agi sünga aliba lima ‘green field’ ka kümdaktsütsüsa asenoki meranga inyakdi ta Environment, Forests aser Climate Change minister, Wb. Imkong L. Imcheni tanü par department nung inyakertem den jembidang metetdaktsü.
“Department nung ozüng aser inyakyim yangluba ajunga ya nübortem yaritsü asoshi yanglubatem lir, anungji government tenzükertemi kechisüdirsüka nübortem tenzükba mapa nung shitak inyaktsüla,” ta paisa ashi.
Wb.Imkong Imchen ya tawa Dr.Shurhozelie chief minister akümba mapang kilonsertem menden asetshitepdang kilonser asütsü asoshi shim aser pa kilonser kümer külen mezüng par department nung tongti ketdangpurtem den tanü shisalemsatepba senden ka menogo.
“Ni nenok ajaki mapa koka inyaktsü imlar aser mapa nung tamakok aludaktsürtem asoshibo temerenshi lateta lir, ta paisa ashi.
Paisa department nung inyaker ketdangsertem dang Japan International Cooperation Agency (JICA) nungi yokba sen crore 533 amshia Nagaland ya süngdonglidong agi sünga kümdaktsütsüsa inyaktsü ajungshi.
Iba kasa senden nung Assistant Principal Chief Conservator of Forest, Dharmendra-i ashiba agi, Environment, Forests & Climate Change department o Japan International Cooperation Agency (JICA) na tsüngda Nagaland nung JICA nungi aputsüba sen amshia küm ter nung arem wazüka ayuba sentongtem inyaktsü terenemba lir.
Iba sen crore 533 nungi JICA nungi sen crore 389 agütsütsü aser state government-i ‘administrative cost’ atema sen crore 144 agütsütsü.
Iba sentong ya yakta tenzüktsü aser iba sentong ya ajanga tekong lu ayimba ajanga arem samadaktsüba anendaktsütsü aser tekong lu ayimba melena pei taküm nüngdak angutsüsa sentong kar atongteta inyaktsü.
Iba sentong tenzüka inyaktsü atema dictrict shia nungi tekong anana shimtettsü aser item tesemtem nungji süngdong atemba yimya tapu pongo amshia inyaktsü.
Iba sentong ya pezübenren nung tema inyaktsü aser mezüngren nung yimtsüng 30 shimtettsü aser tanaben aser tasembenren nung yimtsüng rokerer shimtettsü aser tesüsa pezübubaren nung yimtsüng 35 shimtettsü ta APCCF-isa ashi.
Ano, tekong aser yimtsüngtemjibo meshimtet saka yimtsüng shia Self Help Group tenzüka inyakdaktsütsü asoshi inyakyim kar latetdagi ta paisa ashi.
Principal Secretary, Environment, Forests & Climate Change, L. Kire-i iba sentong nung adenertem dang tajungshi o ashi aser PCCF Wb. I. Panger Jamir menden liasü.