Nagaland ya takar aser tulur ket nung dang lir: ACAUT

Dimapur, July 16 (TYO) : Nagaland nung Rural Development department kübok ochimashi mapa inyakba aser tulur menden nung tim mesüi shimba mapatem jungkai adoka metetdakjaka, state sorkari item meshidak mapa anema inyaktsü memulungbaji, meshitakba lenmang nungi shima alir RDOs / BDO-temji yimsüsür aser tulur chirnur aser kinüngertem asüba agi lir, anungji kecha tesüngmangtsü mali, ta tanü sangdong ka ajanga ACAUT teloki metetdaktsüogo.
Nagaland nung iba ama yimten tashi amshia mashimashi inyakba agi Naga nunger loktiliba nung takar o sensaker na aser tulur o tilar na tsüngda tepila tuluka kümadokogo aser Nagaland ya takar aser yimten tashi alirtem ket nung dang lir, ta ACAUT telokisa metetdaktsü.
Parnokisa Nagaland nung yimsüsür aser tulurtemi ozüng alema inyakba mapatem nübortem nem bilemdangdaktsütsü asoshi metetdaktsüba sangdong ka nung ashiba agi, tim masübalen nungi sorkar mapa tajung nung shimertem ajakji yimsüsür aser tulurtem chirnur aser kinüngertem dang lir aser itemji parnok tangatettep nung inyakba mapatem lir.
Joko, Nagaland nung tulurtemi tim masüba lenmang nungi pei chirnurtem sorkar mapa nung shimtsü maakba tatishitsü ka atishia ashidang, taoba mapang nung RD department nung Principal Secretary kati par jala RDO mapa nung shimba “Appointment Order’ March 4, 2006 anogo nung agütsü. Ano kasa department nung Commissioner & Secretary kati May 27, 2014 anogo nung par jabaso RDO shimba Appointment Order agütsü, iba officer’sangji tang BDO nung regularize asütsü atadagi ta ACAUT telokisa metetdaktsü.
Ano, parnokisa ashiba agi, November 2012 nung shimba RDO kabo ACAUT teloki meshitaki shimba nisung tenüng 36 jungkai adoka memetetdaktsüdangyongi anena adokogo, anungji ano tanüngba rogotemjia anentsüsa RD department-i inyaktsüla ta ACAUT telokisa metetdaktsü.
Nagaland nungbo Personnel & Administrative Reforms (P&AR) department-i dena sorkar mapa nung meshitaki shimba purtem shitak kümdaktsür, anungji zünger mapa mengui alir lanurtem aser kaketshirtemi anir iba ama ochimashi mapa anema nokdaktsüla, ta ACAUT telokisa tayongzükba ka agütsüogo.