Nagaland yimten latettsü mapang agitsü

Kolkata, Aug.06 (Agencies) : India sorkar o National Socialist Council of Nagalim – Isak-Muivah (NSCN-IM) telok na tsüngda tan Hombar nü to Naga yimten latettsü asoshi onük kar nung hai-haura katepba onüktem tang tashi yimjak nung memetetdaktsüba ajanga shitakba Naga yimten telatetba kati yakta arutettsü asü (?) ta asüba terataba tulu nung lir.
Naga nunger telong nung lia Naga yimten nüjiso asoshi raraba otsü ya Northeast nung yimten temeten asoshi mapang talangtiba agia raraba tebilemtsü ka lir saka tangbo iba tebilemtsü ken o ya tatem küma mejembitettsü amai lir.
Parnok tsüngda kechi ken o renemar ibaji Indian Prime Minister’s Office (PMO) nungia aser NSCN-IM telok tsütsü nungia yimjak nung kecha memetetdaktsür asünungji, yimten lenirtem aser sorkar nung alirtemi pei pei bilemba jembi tenzükogo.
Tang tashi nung India sorkar o NSCN-IM na tsüngda renemba onük indang tera lapoka ashibaji Union Minister Prakash Javdekar-i dang shia lir. Pai ashiba agi, NSCN (IM) teloki raraba osettem ajak India sorkar nem agütsütsü mulunga agizükogo aser Naga yimten kübok Manipur, Assam aser Arunachal Pradesh kübok aliba Naga nunger lushi ajak alitsüla ta akangba takangba onüka yutsüogo. Ibaji takok tuluka asütsü,
Union home minister Rajnath Singh dena tangar minister-temi iba onük nung tebang lapoktsü memulunger.
Ajisüaka, Prakash Javdekari ashiba oji NSCN (IM) teloki magizüker. Raraba osettem agütsütsübajibo India sorkari nangzükba ajak ataloker külen dang agütsütsü ta parnoki metetdaktsü.
“NSCN (IM) teloki o ana jembir, tetezü parnok tsüngda ken o kecha renema jembia mali. Sorkari tila ka inyaktetba nung ajemdaker tenüng tulu aginüba agi tiyaksanga inyaker ,” ta Northeast nung telongpurtem mapatem indang shisadanger,Kushav Thakuria-i metetdaltsü.
Tang lemtetba amaji Meghalaya nung küm 40 jakdang November 11, 1975 nung Naga nunger o India sorkar na tsüngda latet, iba dangji ‘Shillong accord’ ta ajar. Iba telatetba ajanga Naga yimten tia tamajungba aküm.
” Northeast nung nübortem asoshi yimjung bener arutsüba mapaji pelashishia agizüktsü, ajisüaka tang NSCN-IM o GOI [government of India] na nübortem dang miima yimten ken o renemba jagibo yimjung bener marutettsü amai bilemer. Northeast India nung nütsüng million 45 aser kin tapu 272 lir. Ano, NSCN-IM dang mas? saka Northeast nung telongpur telok 71 tashi lir. Ano, tanga NSCN telok ana tashi lir asünungji NSCN-IM kijai mulungba nung Naga nungertemi manidaktsüa akok,” ta Manipur Women Gun Survivors Network, aser Control Arms Foundation of India, ngutetsang aser lenir Binalakshmi Neprami osangbener kar den jembidang metetdaktsü.
NSCN (IM) tir Wb. Isak SWu arishi küm 85 jungogo aser pa dang temang mejungi lir. Ano, NSCN tongti zülur Th. Muivah ya arishi küm 78 tambur lir, iba jagi balaka tena taküm alidang langkabosa terenemba linüba agi aritep asütsü ta aikati bilemer.