– S. T. Yapang. Lkr., Kohima.
Tang Nagalima nung ACAUT ajanga totzü meyokteper ayokba putetba ya tejashitsüka lir. Saka aibelenerbo chi aon tajung den chiyungdaktsüa kazür chiokogo, kechiyong shibai timba auyadir mesüra shibai ashikülak mapa tuluba inyakdir item nemji chiyungtsü tajung chiyungdaktsür temaba jenjangi ajungkettsüba limaji Nagalima lir. Telok kar nem bushitsü nongloktsüyonga “Tai kecha mali, parnok nem ang sen talila agütsütsüla,” ta bushitettsü, aji temetet dang.
Iba totzü meyokteper ayokba dang masü tanga ken o a ACAUT nem dang bushidangdaktsütsüla, saka yamaji süra Chief Minister shibai Food & Civil Supplies dena bena lir pa nungi shir peon chowkidar tashi aputsüsa akümtsü akok, kechiyong Nagalima nungbo Driver mesüra peon jagia mapai mao, ainlen mesenzü sür tiyazü zülur DA/TA agizüka agir (kechi mapa nung südir temsüa alir angutsüji tim, item indang ashir masü), kaketshirtema aika aputsüsa akümtsü, kechiyong anarongdena takok angurtemia scholarship sen ishika aginüdang tsüraburji takar süaka aluyimer ta zülur, kodang scholarship form fill up südir Naga nunger tetsü ajak kioker aser tebu ajak aluyimer ta sa akümer, ya kanga tesüngmangtsüka lir, ano osang tamajung kaji aibelener apusangjia tezülen nungi miima shimokba (backdoor appointment) mesüra sen agi alia mapa jagi aiba dang asütsü akok, pai tangarji tepuokdak mepuokdang yongi pa/laji tamasa aputsüsa akümtsü, süra shibai aputsü? Shibai reprangtsü? Kong pudena ayutsü? Item tia ajak angateta Govt-i kodanga ACAUT nem aibelener bushisüngdangtsüji memelatsü.
ACAUT puri putetdang ashikülakertemi parnok jenbutsü asoshi yimsüsür nungi shir obendanger tashi nem süngojemtsü agütsüba sentsüh ajak ya ano nübur dang nungi tetemlok keter saruzüka agitsü. Shir kin aser district anüalema lidir item nüburji itemla ashikülaker nem bendanga agütsütsü, parnoki shishilembaba aser olioraba ajak azüoktsü. Tatishitsü agi Mokokchung District nung oset kar Everyday, Hatsun, White Magik amala parnoki agency agizüker parnoki dang ayoktsü aser tanga tesem nungi bener arutsü memelatsü, saka idangji nübur senteper item agency-ji tepsa intoktsütsüla, kecha osetsa nisung kati dang ayokba alitsü ozüng maka, agency ta sür asen nübur aiben ashioktsüba lir, Kohima nunga itemla agency aika lir, ajisüaka parnokji sen tasakba asünungji shingaia malii Dimapur nungi dang abener, aser parnok dak aji nokdangtsü tashi mali, parnoki aji nokdangtsü merangra, parnok agency ta ashirtemji tamasa tepsa intoktsür külen ang ken o jembitsü.
Alima tezülen aser mashimalu agi sünga aliba den anüalema aliba lima kar nung yimsüsür nem sübokrem agütsür item ashikülakertem yagi agency kar agizüktsü aser pa/lai dang iba osetji iba tesem/town nung ayoktsü, Dokan nung yoknürtema pa dang ang alizüka ayoktsü ta ozüng tesashi amshitsü akok.
Asenoki metettsüba kaji agency ta asüba ya shishilembar telok ka dang lir, shishilembar teloki linük temzüng amshitsüji tamakoktsü, saka mashimalu nübu sünga alidak aser nüburi ola madokba tesem nungbo yimsüsür alizüker, yimsüsüri parnok nem dang iba osetji ayoktsü temelaba agütsütsü aser pa/lai jenjang tasak agi dang ayoktsü, kari tanga tesem nungi sen talangba agi bener arua nübur ajangzüktsüsa sen talang agi yokra pa/laji aibelener akümer. Asen aliba tesem nung agency arua amenokba tetezüji ozüng amshitsüba masü, saka nübur nem jenjang talangba aser oset tajungba tesem tonga bener arutsürba lir, ajisüaka parnoki jenjang tasakba meshira tanga tesem nungi bener arua ayoktsü aser agitsüji shingaia nokdangtsü makok, asenoki aji meteta lidi.
Aikati ashir “ACAUT-i kin kar tejak repranga bushisüngdanger”, saka yamaji kodanga masü, kin kar nungi dang Naga lima nung Department ajak nung tekolak pur lir, parnoki alima yanglutsü melen mapa tamajung inyakba ajanga taiji puteter asünungji item o ya aibelener pusemba ola ka aser aibeleneri pei aibelena aliba putetba ajanga tejashi nung nemnemerba dang lir.
Ashiko, Nagalima ajungtsü asoshi prangpong abener telok ka danga tenteta ali asübo koda jungla, Zunheboto CMO ajanga sen aluzüktsüba, totzü meyoktepa ayoker aser parnok den sentaktepa alirtem rongsen ajak nübur meyong kümla, saka asen Naga nunger tia maka nüchiso bushitsü asoshi tenzükba telok dangashi, Nagalima ajungtsü tentetba perangpong abener telok mali, tang tashi nüjiso bushiba mapaji metembang, odang sarusajitsü nungang nüjisoji angu, saka nüburi telok lemsar ali tashi saruji magütsüli asür, kechiyong longjemer bushi nunga mangur nung lemsar bushi nung angutsüji tamakoktsü ta nüburi angatetadok.
Tekalen ashiba ama, Nagalima yanglushitsü asoshi prangpong abenba telokji joko tangbo menüngdaki kümogo, kechiyong ACAUT-i noknü mebeni ochi agi item tongpang ajak kokteta odagi aser tarutsü Nagalima tasenbajia ACAUT dak nungi dang imlar.
Tang tesüsa 05/08/16 anogo Gauhati High Court, Kohima Bench ajanga ACAUT-i benokba keno ‘Nagaland Sorkar mapa nung contract/adhoc nung shima alirtem regular mekümtsütsü’ obendang agütsüba takok ya ACAUT asoshi Nagalima tasenbai mejakokba mezüngbuba mera asütsü, joko mera merijang ishikadang mejaoker alizüngji atongtsü.
You must be logged in to post a comment Login