Nagamese oshi ya kanga tongtipang

— Rev. C. Bendang Jamir (GCYM) Dimapur.

Tamalen Tir yimyim Osang kaket nung kija aser telok balalai asen Naga nunger common oshi asoshi kanga bilema shisadangtsü asoshi tebilembatem lemsatepba ajakji kija asoshi masü, saka Naga nunger ajak külem ajungtsü asoshi shidanger asü nung, item ajakji kanga tongtipang ta asenok ajaki bilemdi. Aji oda, süaka teti agitsü asoshibo ano kanga aroka shisadanger telemtetbabo agi nungang tajungba südisü ta bilemer.
Naga nunger asoshi common oshi ka ya agidi ta tang tashibo telemtetba ka agia malitsü südi. Saka Tsüngremer taochi ajanga asen Naga nunger nem asen akhi tsürabur putu nung makabba oshi tasen ka Nagamese ya angati sempet agütsüba asoshi Pa tenüng sangdi.
Iba Nagamese oshi ya tanga oshi kar raksar yanglua tenzukdi ta shingaia shia telemtetba agia tenzükba masü. Ano, iba Nagamese jembitetsü asoshi shingaia shinga nema training agüja maru sür nung pasasa dang Assamese, Hindi, Bengali aser English etc. oshitem nungi apuzüka bentepba jembitettsüsa yangluba oshiji Nagamese oshi ya lir, ibai-a kanga tesungmangtsü tulu lir.
Nagamese oshi yagi Naga nunger kin balala ajak ya oshi ka dang ama angateteper, ano Naga nungeri tangar kin balala den oshi ka dang ama angatetepba jembiteter ano tanelatsütsü bilemdangra Tsüngremi asen Naga nunger lenji arua, talangi mouaka, asen atepzüng nung cross-cultural Mission mapa sadema inyaktetsü asoshi item samaba tanelatem kümzükang tasür anir arutsübaa ama Nepali nunger aser India state balala nungi ano tanga kin Khristan masüba pur lakh aika meshimetsür nungi shir tulur temaba menden nung amenertem asen den külem lisema alirtem lir. Anungji aseni meteta aliba Nagamese oshi ajanga parnok dang Tsüngrem o shia aika amangdakja Baptir Khristan küma Nagamese Baptist arogotem aika tenzüka odagi.
Mapang talangka sarasadema arur 15th Feb 2008 küm Dimapur centre sür Nagamese Baptist Churches Association (NBCA) tenzükogo. Aser tanabuba nung Nagaland Baptist Churches Council (NBCC) nung affiliate asütsü asüngdangba ama 2011 küm affiliate süogo. Ano Nagaland tesem balala nung aliba Nagamese Baptist Arogotem aika affiliate mesüi lir, itemji kodang südir noklang juna akümtsü, ano arogo tasen renloka aotsü maneni inyakdagi.
Nagaland Baptist Churches Council (NBCC) ajanga nüngdakba nung rongsen jenti agi nungita yaria aruogo, ano NBCC kübok Mungdang (Association) aser arogotemi Nagamese Baptist Churches Association (NBCA) staff-tem nem ita sen agütsüba nung yaridagi, ya asoshi kanga pelar. Iba ya ajanga mapa ajak takok ngua arudagi.
Nagamese Baptist Churches Assoication-i (NBCA) Nagamese ken kaket (Hymnal), revival ken kaket adoka amshidagi. Ano Bible Society teyari ajanga tasen lai (N.T) tan Nagamese nung meyipdagi aser Church Manual yakta renemtsü. Joko kaket ken-o adoka aoer asü nung Nagamese Bazar o dang jembia aliba tang nungi terabo tajungba ojang, spelling aser Grammartical shitak liromedema amshia aotsü asohi Nagamese Dictionary-a kar adoka amshidagi.
Oda tanü temetetba putu nung Naga nunger tashi temetetertem shisadanga Naga nunger asoshi common oshi ka yanglutetra aji ajak asoshi temoatsü asütsü. Ajioda yanglutetaka, iba oshiji ajaki lirumedema shia meteta jembitet nungang amshitetsü südi.
Anungji Naga nunger asoshi common oshiji yanglua mamshitet tashijibo, tan asen ajaki shia aliba Nagamese ya kanga tongtipang aser iba oshi yagiang kin balala meyoktepba aliba yimten, arogo aser loktiliba ano Naga nunger kin-o-kin na aser tanger kin den-a yimsüsüba, sayutsüngiba aser jembishinüba ajak nung iba Nagamese oshi yagi tang tipdema angatetepba otettsü sudi. Anungji tang asoshibo Nagamese oshi ya ajak asoshi kanga tongtipang oshi ka lir.