Nagaon okadaki handcuff masütsü tuyu

Guwahati, January 22 (Agencies): Nagaon nung okadaki police dang Karbi Anglong loktii nisung tepsetba ken o tai tonglokja alirtem okadaki anir arudang aser aodang handcuff masütsü atema tetuyuba agütsüogo.
Taoba mapang tai tonglokja alirtemi police-i parnok teka alenba atema aija liasü.
Yaküm June 8 nü Abhijeet Nath aser Nilotpal Das tepsetba atema nisung 48 dak tai tonglokja lir. Guwahati lanur anaji Karbi Anglong district kübok Panjuri nung tanur apurtem ta temulung melemi bilema tepset.
Tang tashi nung iba ken o atema tai tonglokja nisung 47 tashi Nagaon Central Jail nung puoka lir.
Tai tonglokja alirtemi ashiba agi parnok handcuff asübaji ozüng alema inyakba mapa ka aser meimchir temeten anema inyakba mapa ka lir.
Iba ken o atema special public prosecutor Advocate Ziaur Kamar-i ashiba agi “Tai tonglokja alirtemi mepishiba ama okadaki inyakogo. Supreme Court ajanga handcuff mamshitsü atema tenokdangba kecha mali.”
Iba ken o ya February 2, 2019 nü maneni angadangtsü.
Abhijeet aser Nilotpal na kinungertei fast-track court ka ajanga ken o bushisüngdang asütsü atema takhangba agütsü saka mapang agitsü ama repranger.
Iba ken o ya Guwahati-i belentsü akok aser idakji mapang agitsü. Tang tashi nung kuli agütsür nisung 70 indang kulitem bendenogo.
Taoba mapang Assam Police indang Special Investigation Team (SIT)-i iba mapa ya Alfajoj ta nisung kati tasa atonga inyak ta ashi.
Alfajoj-i Nilotpal aser Abhijeet naji tanur apurtem ta yimdaklirtem dang ashi.
Abhijeet aser Nilotpal na Kangthilangso waterfalls reprangtsü atema aoba liasü saka iba mapang yimdaklirtemi tena pur zükset.