Nagaon Paper Mill nung inyakertemi Tir Kovind dangi shidi zülutsü

Guwahati, Rongjui (September) 14 (Agencies): Assam kübok Jagiroad nung aliba Nagaon paper mill nung mapa inyakertemi Tir Ram Nath Kovind dang parnok nem tasütsü temeten agüjang ta shidi zülutsü lemtetogo.
Parnok taküm liyonga aotsü atema teyari magütsütetra, parnok asütsü temeten agüjang ta parnoki Kovind dang ashitsü.
Nagaon mill ya unit ana rongnung ka lir. Hindustan Paper Corporation-i acha-ayangba paper mill indang unit tanabubaji Cachar nung lir.
2015 küm Cachar unit nung production anen aser Nagaon mill ji yaküm shibang. Iba ajanga mapa inyaker 1,500 shi timtemer.
Tesüiba küm asem tsüngda nisung 37 shi soseta süogo. 2016 assembly election matongdang BJP-i public sector paper mill ana asentenshia lapoktsü nangzüka liasü.
“Onok chirnurtem school aser college azüngba nung tetsükdaktsü ajuruogo. Onok sentsüh agi tsübangogo. Sen apuba magütsütetba ajanga bank temi onok meinpronger. Ita aika indang itasen manguba agi onok kanga timtemer. Onok taküm tangar ama liyonga moutettsü süra, onok nem tasütsü indang temeten agütsütsüla” ta Kagaj Nigam Karmi Union (KNKU) general secretary, Ananda Bordoloi-i ashi.
Nagaon mill nung mapa inyaker 1,200 shi ka, parnok kinungertem aser tangartemi Jagiroad nung NH-37 mokdanger lungkak ait. Centre sorkari paper mill ana asentenshia lapoktsü atema sen crore 1,800 magütsüba anema parnoki lungkak ait.
“Chief minister Sarbananda Sonowal-i taruba anogo ishika tsüngda Centre den jembitsü imlaba agi onoki lungkak aitba khen atema anena atar. Kecha matalokra onoki CM’er kima nung lungkak aittsü aser Tir dangi shidi zülutsü” ta Bordoloi-i ashi.
August 15, 2018 nü paper mill nung mapa inyakertemi lumia lungkak aittsü tenzük aser August 17 nü Jagiroad nung lenmang mokdang.
Assam state industry department-i ashiba agi paper mill asentenshia lapoktsüba onükji tang Prime Minister indang Office nung lir.
Centre-i mapa inyakertem khen yaritsü atema taküm April ita Rongali Bihu mapang ita asem indang itasen agütsü.
Ajisüaka, mapa inyakertemi ashiba agi ita asem indang itasen agütsübaji tzüyim nung tzü jang ka ama lir.
“Onoki anguba senji sentsüh agütsüdang agimaogo. Tesüiba ita 18 tashi onok nem itasen magütsüi arudang sentsüh atsühba meyipa agütsü” ta Bordoloi-isa metetdaktsü.