Nagatsür ka Chennai nung asüba bener aru

Dimapur, July 12 (TYO) : Chennai nung hotel ka inyaker küm 19 tain Nagatsür ka tenüng agi Paigutyile (Sisy) ramen agi shiranga taoba hopta nung mozü kidang asüba temang tanü Bodbar nü Indigo Airline tayimtsü nung angati Dimapur tongtsüogo. Item teyari ajakji Delhi nung Norteast purtem timtem nung yaritsü asoshi tentetba telok Helping Hands den yariteper Inspector General of Police (IGP), Robin Hibu ajanga inyaktepba liasü.
La ya Peren district kübok Nsong town nung alir ka liasü. Osang ajanga angazükba agi, taoba küm tentet jakdang tetsü süa adok aser iba sülen tebui la toktsür oa adok. La ya class 8 tashi dang zünger, Nagaland nung mapa manguba agi Chennai nung oagi hotel ka nung inyaka liasü.
La mang ki tongtsütsü atema Robin Hibu leniba nung NE Helping Hands Volunteer-temi anepalua liasü saka senotsü nung timtem aliba agi lar kinungertembo shinga Chennai tashiji moutet.
La masüdang mozü kidang la yarir nurse dang la asü nungbo la mang la alidak Nsong yimtak dang remdaktsüner ta shia liasü ta KMC Hospital, Chennai nung inyaker nurse-ka jagi Robin Hibu IPS den jembidang metetdaktsü.
Robin Hibui Indigo Airlines dang la temang Dimapur tongtsütsü mepishiba ama parnoki agizük aser Chennai nungi Kolkata atongdanga Chennai nung Helping Hands Volunteer-temi yariba amato Kolkata nunga Helping hands Volunteer-tem dang yaritsü shia liasü.
Parnok ajak jagi yaritepa tanü Bodbar nü Sisy temang Dimapur atongdang lar kinungertem den Naga nunger temeimertemi la mangji agizük aser nikongdang New Jalukie tongogo.