Nagpur university nung RSS tapak enoksemba atema ashishir

Nagpur, July 9 (Agencies): Nagpur nung amenoka aliba university ka indang syllabus nung Rashtriya Swayamsevak Sangh (RSS) indang putiotsü aser linük yangerba nung parnoki shilem agiba benokogo.
Nagpur ya RSS headquarters lir aser iba University jagi RSS den Hindu Mahasabha aser Muslim League teloktem dak kongshiba “Rise and Growth of Communalism” agien aser iba melena ‘RSS’s role in nation-building’ benok.
National Students Union of India (NSUI)-i syllabus nungi iba shilemji agientsü atema takhangba agütsür aser parnoki lungkak aittsü ta amokmerenogo.
NSUI city unit president Ashish Mandpe-i anir züngsemtemi Mongulbarnü Vice-Chancellor Siddharth Kane den ajurutep aser university-i syllabus nung RSS indang tapak ka enoksemba magizüker ta ashi.
Iba tapakji magienra lungkak aittsü, ta parnokisa Vice-Chancellor dang ashi.
Taoba Chief Minister Ashok Chavan-ia iba onük atema Twitter nung “kaketshirtem dang RSS-i Quit India movement 1942, Indian Constitution aser National Flag anema noktakba indang sayutsüla” ta university telemtetba luja metetdaktsü.