Nai kechi amanger?

Dawidi ashi, “Kari kor talungtsütem, kari kortem nung; saka onoki ozü Tsüngrem Kibuba tenüng bilemtettsü” (t.7). Tasüngdangba tuluji, tanü nai kechi nung amanger? Ajaki langka nungbo amanger. Kari sen dak temulung alemer. Kari pei temetetba nung amanger. Tekong 1 aser 2 nung ashir, “Timtem anogo nung Kibubai ne dang langzüang! Yakob Tsüngrem tenüng agi na kümzüka lidakjang; Temeshidak nungi ne dangi teyari yokang aser Zion nungi na tashi itdakjang.” Khristani Kibuba dak amanger aser sarasadem ajanga pa tamang kuli asür.

Kodang asenok timtem nung lidir iba tebilemtsü nung yaritsü aser timtemji takok agi melentsü asoshi asenoki shiba dangi aotsüla mesüra shiba dak amangtsü? Kodang timtem agi atonger kari parnok senpong repranger. Sen agi parnok tebilemtsü yaritsü ta parnoki bilemer. Kari telephone dangi aor. Parnok timtem nung yaritsü asoshi parnoki tembartem bushir. Kari kor talungtsü aser kari kor dak temulung alemer, Khristani Kibuba tenüng bilemtetter (t.7). Asenok tamang Yisü Khrista nung lir, aser aji tangar nem metetdaktsütsü asenoki metsübutsüla. “Ne dak takok madak onoki washia pelatsü, aser onok Tsüngrem tenüng nung onoki onok nisan asongtsü” (t.5). O ka nung, onoki onok tamang nisan ayipshitsü onoki matidaker kechiaser Pai tamakok maludaktsütsü.

Tsüngrem tenüngji tajung lir. “Yakob Tsüngrem tenüng agi na kümzüka lidakjang” (t.1). Kibuba dak amangtsü mapang agiang. Ne khu Pa nem nongokjang. Pa nungi tashi agiang. Kibuba tenüng nung ne nisan ayipshiang aser Pai ne khuret temoatsü ka kümdaktsütsü. Ne tamang kong ayur? Rongsen aser tangari tamakok aludaktsür, Yisui kodanga tamakok maludaktsür. Ne khuret ajak Pa nem agüjang. Pa dak amangang, aser Pai na asoshi inyaktsü.