Dimapur, February 14 (TYO) : Julie C Film production-i ‘Dukh 2’ ta ser Nagamese film tanabuba sayaogo.
Deobarnü Book Marc conference hall nung NBDA & NEPED Advisor, Naiba Konyak-i iba film sayatsü.
Film yanglurtemi tayongzükba tulu kokteta film yangluba atema Naiba-i parnok nem tenüngsang agütsü aser tarutsü anogotem nung Nagaland nunga film industry jenjang tajungba akümtsü imlar, ta paisa shisem.
Sentong nung tetsushi süa jaoker, Saku Longchar-i o jembidang ashiba agi, Tsüngremi nisung ajak khenyongi balala yanglu aser asenok tsüngda telongjem, mapang shitak amshiba, temulung lemtep aser külemi inyakra, asenoki mapa tulu inyaktettsü.
Saku ya Ao kentener telok ‘Samaro’ nung züngsem ka lir aser paisa parnok telok mezüng tenzükdang timtemtuoshi ajurubatem indang kar jembi.
‘Dukh 2’ film Director, Meren Ozukum-ia o jembidang, film nung shilem agirtemi facility peria meliaka meranga inyakba atema pelaba metetdaktsü.
Asen nisungtemi Nagamese film kangabo mesapur ta Meren-i ashi aser maneni pai film kar produce asütsü ta paisa shisem.
State sorkaria music & art dak sendakba wadang nung teyari agütsüba ama film industry nem teyari agütsütsü imlar, ta paisa metetdaktsü.
Sentong nungsa film producer, Neangbah Konyak-i tesentepertem pela agizük aser KBCD Associate Pastor, Popa-i temoatsü meshia sarsadem.

You must be logged in to post a comment Login