Naidu aser Modi nati Constitution Day salem lemsatep

New Delhi, Yimpoksüi/Nov. 26 (Agencies): Tanü linük tatong Tir, M. Venkaiah Naidu aser Ato kilonser, Narendra Modi nati Constitution Day nung linük nüburtem den salem lemsatep.
Naidu-i twitter ajanga, “Tanü Constitution Day anogomong nung ni linük nüburtem nem tetushi agütsür. 1949 küm iba anogo nung India nungeri Dr. Babasaheb Ambedkar leniba nung renemba linük temzüng agizüka liasü,” ta metetdaktsü.
Pai ashiba agi, India nüchiso anguba sülen Constituent Assembly-i küm ana ser ita 11, aser anogo 17 nung senden 11 amendang Arrla 395 den Schedule 8 aliba Draft Constitution agizük.
Paisa, “Tangbo asenok nija aser loktii linük nüburtem teinyaktsü mapa ka ama item temzüng benshir,” ta ashi.
“Asenoki nija aser lokti nung constitutional bodies aser inyakyim nung tamang kaa akhümketa alitsüla. Constitution Day nung ni tenüngsang agütsür,” ta paisa metetdaktsü.
Ano Ato kilonser, Modi-i twitter ajanga, “Constitution Day anogomong nung asenoki Constituent Assembly nung züngsemtem mapa bilemteter. Asen Constitution atema asenok nüma atanger aser item temzüngtem benshir,” ta ashi.
Ato kilonserisa pai ita shia radio ajanga linük nüburtem den jembiba programme “Mann Ki Baat” indang link ka lemsatep. Iba link nungji pai India nunger Constitution renemsang Ambedkar indang jembia lir.
Constitution Day, koba dang “Samvidhan Divas” taka ajar, iba anogomong ya küm shia November 26 nü monga Indian Constitution agizükba bilemteta amonger. Indian Constitution ya 1949 küm November 26 nü agizüka liasü aser 1950 küm January 26 nungi benoka benshia arur.
2015 küm November 19 nü India sorkari November 26 anogo ya Constitution Day asütsü, ta sangdonga liasü.