Najeeb Jung-i sodi meshiba ajanga ni aoksar: Kejriwal

New Delhi, December 22 (Agencies): Brihostibarnü Delhi Chief Minister, Arvind Kejriwal-i, Delhi Lieutenant Governor (LG), Najeeb Jung-i pa menden nungi sodi meshiba ajanga aoksar, ta ashi.
AAP-i, Ato kilonser, Narendra Modi tetuyuba kübok LG-i inyaka aruogo, ta aijaka Kejriwal-i iba o jembiogo.
AAP-isa, LG tasen shimba sülen-a Centre aser Delhi sorkar tsüngda tashi rakteptsü akok, ta ashi.
AAP tongti, Kejriwal-i, Jung-i sodi meshiba ajanga aoksar ta ashiba den külemi tarutsü nung pa maparen ajak nung takok ngudakjang, ta ashi.
Ano Delhi Deputy chief minister, Manish Sisodia-ia, “tako-tanang” aika ajangshia aruaka AAP sorkar aser Jung-i Delhi nung mapa tajung inyakogo, ta ashi.
Delhi minister Kapil Mishra-ia, “Tarutsü nung Najeeb Jung maparen ajak nung takok ngudakjang ta sarasademtsür. Pa madak inyakertem nem Tsüngremi shisa tajung agütsütsüla. Jung sülen-a maneni tashi rakteptsü asü?” ta ashi.
Ano AAP lenir, Kumar Vishwas-ibo, Jung inyakba mapangji majung liasü, ta ashi.
Vishwas-i, Modi tetuyuba kübok LG-i Delhi sorkar nem timtem agütsü, saka Jung-i menden tajungba angutsü imlar, ta ashi.
“Modi sorkari par nisungtem jenjang ajungkettsür. Iba sülen pai jenang tajung angutsü ta ni imlar. Pa inyakba mapangji majung liasü. Tangbo pa oadoker, anungji pa atema tajungtiba bilemtsür,” ta Vishwas-i ashi.
“Najeeb Jung-i inyakbaji pa ajanga masü. Pai kar kübok inyak. LG tasenba jagibo nüburtem tebilemtsü atema inyaktsü imlar aser tangar kübok meinyaktsü imlar,” ta paisa ashi.
Brihostibarnü Delhi LG, Jung-i ajungbena pa menden nungi sodi meshiogo.