Najma Heptulla-i Manipur Angh inyaktsü tenangzükba agi

Imphal, Aug 21 : Manipur High Court Acting Chief Justice, Rakesh Ranjan Prasad-i Najma A Heptulla Manipur Governor asütsü atema Raj Bhavan, Darbar Hall, Imphal  nung tenangzükba agidaktsüba noksa nung angur. La ya Manipur nung governor 18 buba asütsü. 

Imphal, August 21 (Agencies) : Taoba Bharatiya Janata Party (BJP) Vice President, Najma Heptulla-i Manipur nung Angh 18 buba inyaktsü atema Deobarnü tenangzükba agiogo.
Imphal nung aliba Darbar Hall, Raj Bhavan nung sentong ka ayongzüka agidang Manipur High Court nung Acting Chief Justice, Rakesh Ranjan Prasad-i Heptulla nem tenangzükba agidaktsü.
Sentong nung Chief Minister, Okram Ibobi Singh den minister tem aser MLA tem aden. Parnok den külemi civil, police aser sepai ketdangsertem aika aden.
Taküm July ita tashi Heptulla ya Prime Minister Narendra Modi’er council of ministers nung züngsem ka liasü.
BJP nung arishi küm 75 ser temapurtemi minister menden toktsütsüla ta telatetba ka aliba nung ajemdaker July 12 nü lai Minority Affairs Minister menden nungi anen.
Tanü Heptullah-i tenangzükba agiba sülen ashiba agi, la Angh ama mezüng Manipur indang sobaliba metettsü merangtsü.
Dr. Najma Akbarali Heptulla ya April 13, 1940 nü Bhopal nung aso. 1986 aser 2012 tsüngda lai Rajya Sabha nung kümsük punguben tashi MP inyak aser iba mapang lai küm 16 atema Rajya Sabha nung Deputy Chairman inyak.
2012 küm la Madhya Pradesh nungi BJP-i Rajya Sabha züngsem asütsü atema tenüng jateta shim aser lai April 24, 2012 nungi iba mapa inyaktsü tenzük. May 26, 2014 nü Narendra Modi-i aniba sorkar nung la cabinet minister inyaktsü tenzük aser taküm July ita tashi lai iba mapa inyak.
Dr. Najma ya Motilal Vigyan Mahavidyalaya (MVM) Bhopal nung school azüng aser lai Zoology nung Masters’ of Science Degree aser Zoology (Cardiac Anatomy) nung PhD ngua lir.
1966 küm la Akbarali A Heptulla den kibong aküm saka la kinungbo September 4, 2007 nü alima nungi pila ao. Tena jala asem agi sosema lir.