NAMASTE sentong nung Angh Acharya-i shilem agi

Guwahati, Rongjui/September 25, 2018: Nagaland Angh PB Acharya-i anir kima yimtong merekba mapang osangbenertemi noksa tangokba yangi angur.

Dimapur, Rongjui/September 26 (TYO): Nagaland Angh aser Swachh Bharat Mission National Brand Ambassador PB Acharya-i Rongjui/Sept 25 nü Rajbari Fields, Manipuri Basti, Guwahati nung North East NAMASTE States Swachh Bharat Mission Committee brand Ambassador tem den Swachh Bharat Abhiyan North East States (NAMASTE) sentong nung shilem agiogo.
Sentepa aliba lokti den o jembidang Angh Acharya-i ki temeket meraka ayutsüba aser jana indoklen aser kilentsü shidak ayutsü koda tongtibang, iba indang jembi. Pasia, merekmeju ya kidang nungi tenzüktsüla aser kibong shia nung metsümeshidak shidak yanglua kima yimtong nung metsümeshiba anentsü ayongzük.
Anghisa ashiba agi, Swachh Bharat Mission ya Ato Kilonser Narendra Modi-i 2014 küm Mongputeni/Oct 2 nü amenok aser iba mission kübok lokti atema metsümeshidak crore 2.52 yangluba den kibong crore 1 atema metsümeshidak yanglutsütsü asoshi nükjidong lir.
Iba mission ajanga kima yimdong nung metsümeshiba aser manual scavenging anendaktsüba den modern aser scientific municipal solid waste management ajungketa 2019 Mongputeni/Oct 2 nü Mahatma Gandhi sur küm 150 ajungba tashi nungbo India merek mereka alitsü nükjidong lir, ta rasaa ashi. Maneni pai iba mission nung shilem agia linük ajungketba nung shilem agitsü ayongzük.
Iba sentong nung North East NAMASTE States Swachh Bharat Mission Committee, Convener Sotai Kri (Arunachan Pradesh) aser Committee züngsemtem rongnungi Neelam Dutta (Assam), Ram Pada Jamatia (Tripura) aser Shoupen Phom (Nagaland) nunger aden.
Sentong tembangba sülen Anghi anir merekmejuba sentong ka agia liasü. North East NAMASTE States Swachh Bharat Mission Committee züngsem ajak aser nüburtemi iba merekmejuba sentong nung shilem agi, ta Governor PRO sangdong ka ajanga metetdaktsü.