Nancy Pelosi-i Dalai Lama den ajurutep

Dharamsala, May 05 (Agencies) : US nungi House of Representatives nung Democratic Party lenir, Nancy Pelosi-i aniba telok kati Dharamsala nung taruba hopta Dalai Lama den ajuruteptsü, ta Hokolbarnü ketdangser kati ashi.
US nung congress züngsem teneti Pelosi meina arutsü. Pelosi-i mapang talangka nung Tibet tebilemtsü nungita liasü. La meina arutsüpurji Jim Sensenbrenner, Eliot Engel, Jim McGovern, Betty McCollum, Judy Chu, Joyce Beatty aser Pramila Jayapal nungertem lir.
China-i Dalai Lama ji China aser Tibet na tebendang adokdaktsür ka ama züngshir.
Tibet nungi jena arua Dharamsala, India nung jenoka alisang den US nungi züngsemtemi May 9 aser 10, 2017 anogotem nung ajuruteptsü, ta Central Tibetan Administration (CTA) nung otongdar kati osangbenertem dang ashi.
Dalai Lama den ajurutepa dang masü saka parnoki ano CTA nung inyakertem aser tang linük toktsür jenshia alisang, Ato Kilonser Lobsang Sangay nunger dena ajuruteptsü.
Pelosi-i March 2008 nung Dharamsala semdangba sülen tan mezüng semdangtsü. La 2008 küm aruba mapang la US House of Representatives nung Speaker liasü aser 2007 küm Dalai Lama nem Congressional Gold Medal agütsüba inyakyim nung la tongti liasü.
US-i Dalai Lama semdangtsü osang angashia China-i aitsüogo.
“US Congress-i tan mezüngsüa onok semdangtsü sentong aser Nancy Pelosi-i Dharamsala tanaben semdangtsü angashia kanga pelar,” ta Sangay Lobsang-i ashi.
Congress lenirtem agizüktsü asoshi CTA-i lokti ayonga lir. May 10, 2017 nü Tsuglakhang temple nung Dalai Lama-i iba senden nung silem agitsü. Iba temple ya Dalai Lama aliba ki anasa lir.
Dalai Lama den külemi Tibet nunger 140,000 shi linük nungi jena ao aser item rongnungji parnok 100,000 shi India nung jenoka lir. Tibet nung Tibet nunger nisung million trok dak tali lir.