Nangzükba inyak nung dang Trump-Kim ajuruteptsü: White House

Washington, Metsüremi 13 (Agencies) : Missiles aser nuclear sentong atema Pyongyang-i kechi nangzüka lir ibaji shidak inyak nung dang US Tir, Donald Trump o North Korea lenir, Kim Jong-un na ajuruteptettsü, ta US-i nenshia shiogo.
Senden alitsü atema Kim-i US Tir, Donald Trump jaokba indang taoba hopta nung national security advisor-i anir South Korea nunger teshimtet telok ka aruagi sangoktsü. Kim-i jaokbaji Trump-i mulunga agizük aser iba osangji angashia alima ajak süngmangtepogo.
Nuclear oset yangluba anentsü, ta North Korea leniri nangzüka shiogo saka Trump-i ashiba agi, senden mamenba jakdang missile metendangtsü ta Kim-isa nangzüker liasü.
“Sendenji amentsü ta onoki kanga temulung lemteta bilemer. Senden amentsü mepishiba ama onoki agizükogo. North Korea-i kechisarena aika nangzüka lir aser parnoki nangzükba ama itemji mapa küma inyaktsü onoki imlar aser yamaji süra sentong renemba ama sendenji katettsü,”
ta osangbenertem den jembidang White House nungi Press Secretary, Sarah Sanders-i metetdaktsü.
Tang Trump-i aniba yimteni senden atemaji lenmang balala nungi asameyanga renemdagi.
Iba denji külemi ano US National Security Advisor HR McMaster aser UN atema shimteta aliba US Ambassador, Nikki Haley nati North Korea dak sendakba inyakyim indang UN Security Council züngsemtem den lemsatepa liasü.
“US Tir, Trump o North Korea lenir, Kim na ajurutepa senden amentsü atema sangdonga aliba ya alima rangben atema otsü asütsüsa maongka tulu lir,” ta Haley-i metetdaktsü.
Laisa ashiba agi, “Kim-i senden amentsü ayongzükbaji atangji asü masüar onoki tejangja ashitsü makok saka otsü asütsüsa tena senden amenbaji alima nung aliba kin balalai ajungshiba aser Trump-i aniba yimteni anepalua inyakba ajanga lir.”